تەرەڭكول، پاۆلودار اۋداندارى مەن اقسۋ قالاسىنىڭ باسشىلارى قاردى دەر كەزىندە شىعارۋ جانە سۋ تاسقىنىنا قارسى دايىندىق جۇمىستارىن ءتيىستى دەڭگەيدە جۇرگىزبەگەن. ءقازىر ايماقتا 21 ءقاۋىپتى ۋچاسكە باقىلاۋعا الىندى.
«بۇگىنگى تاڭدا وبلىس بويىنشا 14 ءقاۋىپتى ۋچاسكە باقىلاۋعا الىنىپ، وندا 133 ادام، 51 بىرلىك ارنايى تەحنيكا، 35 موتوپومپا جۇمىلدىرىلدى. پاۆلودار مەن تەرەڭكول اۋداندارىنىڭ، سونداي-اق اقسۋ قالاسى اكىمدەرىنىڭ جۇمىسىن قاناعاتتانارلىقسىز دەپ سانايمىن. سۋ تاسقىنىنا قارسى ءىس-شارالاردى جۇرگىزۋدەگى باقىلاۋدىڭ السىزدىگى ءۇشىن ولارعا قاتاڭ سوگىس جاريالاندى. مەنىڭ تاپسىرمام بويىنشا بارلىق سۋ تاسقىنىنا قارسى ءىس-شارا قازىرگى جاعداي تۋرالى ساعات سايىن بەرىلەتىن ەسەپ تاۋلىكتىك رەجيمگە اۋىستىرىلدى جانە مەنىڭ جەكە باقىلاۋىمدا بولادى»، - دەدى پاۆلودار وبلىسىنىڭ اكىمى اسايىن بايحانوۆ.
وڭىرلىك توتەنشە جاعدايلار دەپارتامەنتى باسپا ءسوز قىزمەتىنىڭ حابارلاۋىنشا، قازىرگى ۋاقىتتا پاۆلودار، ماي، ۋسپەن، پاۆلودار، شارباقتى، اقتوعاي، ەرتىس اۋداندارى مەن اقسۋ قالاسىنىڭ جەكەلەگەن ەلدى مەكەندەرى بويىنشا 21 ۋچاسكە ايرىقشا باقىلاۋعا الىنعان. ءبىرقاتار ەلدى مەكەندە ءۇي اۋلالارىن، شارۋاشىلىق عيماراتتارىن سۋ باسقانى تۋرالى اقپارات تۇسكەن. جەرگىلىكتى اتقارۋشى ورگاندار مەن توتەنشە جاعدايلار قىزمەتكەرلەرى سۋ جىرۋ، سۋدى سورۋ جۇمىستارىن جالعاستىرىپ جاتىر.
بۇعان قوسا اۆتوموبيل جولدارىنىڭ 6 ۋچاسكەسى باقىلاۋدا تۇر. قىزمەتكەرلەرى مەن جەرگىلىكتى اتقارۋشى ورگاندار ەلدى مەكەندەرگە تاۋلىك بويى مونيتورينگ جۇرگىزىپ وتىر.
