ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

الماتىداعى ءتىس ەمحانالارىندا بالالارعا ارنالعان اشىق ەسىك كۇندەرى باستالدى

01 ماۋسىم 2022 80
وڭتۇستىك استانادا حالىقارالىق بالالاردى قورعاۋ كۇنىنە وراي «بالالارعا كۇلكى سىيلا» دەپ اتالاتىن شارا باستالدى. ماۋسىمنىڭ 16-نا دەيىن جالعاساتىن اكسيا بارىسىندا 18 جاسقا دەيىنگى بالالار ستوماتولوگيالىق قىزمەتتەردى تەگىن پايدالانا الادى.
مەديسينالىق ساقتاندىرۋ قورى الماتى فيليالىنىڭ مۇرىندىق بولۋىمەن قولعا الىنعان اكسياعا قور بازاسىنداعى جەكە مەنشىك ستوماتولوگيالىق كلينيكالار قاتىسىپ جاتىر.
«بۇل بالالارعا دەمالىس كەزىندە تىستەرىن ەمدەتىپ الۋعا مۇمكىندىك بەرەتىن تاماشا اكسيا. شارا ءتىستىڭ شىرۋىنە جول بەرمەي، ۋاقتىلى ەمدەۋ ماسەلەسىنە بالالار مەن اتا-انالاردىڭ نازارىن اۋدارۋ ماقساتىندا وتكىزىلىپ وتىر»، - دەيدى «الماتى قالاسىنىڭ بالالار ستوماتولوگيالىق كلينيكاسى» ج ش س ديرەكتورى تورەتاي رۋزۋددينوۆ.
اشىق ەسىك كۇندەرىنىڭ كەستەسى:
• «الماتى ق. بالالار ستوماتولوگيالىق كلينيكاسى» ج ش س – 1-ماۋسىم
• «BayanSulu Clinic» ج ش س – 2-ماۋسىم
• «تاۋگۇل-دەنت» ج ش س – 3-ماۋسىم
• «VITA DENTAL CLINIC («وبلىستىق بالالار ستوماتولوگيالىق ەمحاناسى» ج ش س) – 4-ماۋسىم
• «Dr.Bibi Clinic» ج ش س – 6-ماۋسىم
• «الماتى ق. ورتالىق ستوماتولوگيالىق ەمحاناسى» ج ش س – 7-ماۋسىم
• «الەۋمەتتىك بالالار ستوماتولوگياسى» ج ش س – 8-ماۋسىم
• «Khan Stom» ج ش س – 10-ماۋسىم
مسق الماتى فيليالى ديرەكتورىنىڭ ورىنباسارى جانار كەنجەبايەۆانىڭ ايتۋىنشا، بۇل كلينيكالار بالالارعا ساقتاندىرۋ ەسەبىنەن جوسپارلى ستوماتولوگيالىق كومەك تۇرلەرىن دە كورسەتەدى.
«مىندەتتى الەۋمەتتىك مەديسينالىق ساقتاندىرۋ ارقىلى جۇكتى ايەلدەر مەن 18 جاسقا دەيىنگى بالالارعا ستوماتولوگيالىق كومەك تەگىن كورسەتىلەدى. ولاردىڭ اراسىندا ءتىستى جانسىزداندىرۋ، حيميالىق پلومبا سالۋ، تەراپيەۆتىڭ قابىلداۋى، پۋلپيت پەن پەريدونتيتتى ەمدەۋ، فليۋوروز، گيپوپلازيا كەزىندە ءتىستىڭ اناتوميالىق ءپىشىنىن تولىق قالپىنا كەلتىرۋ، ءتىستى حيرۋرگيالىق جولمەن جۇلۋ ت.ب. قىزمەتتەر كىرەدى»، - دەپ اتاپ ءوتتى جانار كەنجەبايەۆا.
ەستەرىڭىزگە سالا كەتسەك، «بالالارعا كۇلكى سىيلا» شاراسى بارىسىندا كىشكەنتاي پاسيەنتتەرگە ءمامس پاكەتىنە كىرمەيتىن ورتوندونتتىق كەڭەس كورسەتىلمەك. جاق پەن ءتىس قۇرىلىمىنداعى اقاۋلاردى ارنايى قۇرىلعىلاردىڭ كومەگىمەن تۇزەتكىسى كەلەتىندەر ورتودونت ماماننىڭ كونسۋلتاسياسىندا بولىپ، تەگىن كەڭەس الا الادى.
بۇل ماقالا تۋرالى نە ويلايسىز؟