تۇركىستان وبلىسىنداعى جەمقورلىققا قارسى ەرىكتىلەر 578،7 ملن تەڭگەدەن استام بيۋدجەت قاراجاتى نەگىزسىز جۇمسالۋىنىڭ الدىن الىپتى.
وبلىستىق سانيتارلىق-ەپيدەميولوگيالىق باقىلاۋ دەپارتامەنتى نارىقتىق قۇنى 15 مىڭ تەڭگە بولاتىن ءبىر توننا كومىردى 250 مىڭ تەڭگەدەن ساتىپ الۋدى جوسپارلاعان.
ەرىكتىلەردىڭ ارالاسۋىنان كەيىن ساتىپ الۋ جوسپارى قايتا قارالىپ، 30،2 ملن تەڭگە ۇنەمدەلدى.
ال، وتىرار اۋدانى قاراقوڭىر اۋىلدىق وكرۋگىنىڭ اكىمدىگى ەلەكتر ەنەرگياسىنىڭ 1 كۆت-ىن 580 تەڭگەدەن ساتىپ الماق بولعان. بۇل ىسكە دە ەرىكتىلەر ارەكەت ەتىپ، بيۋدجەتتىڭ 26،1 ملن تەڭگەسىن ۇنەمدەپ قالدى.
سوزاق اۋدانىنىڭ ءبىلىم ءبولىمى 1 750 كەلى ءسابىزدىڭ ءبىر كەلىسىن 16 786 تەڭگەدەن ساتىپ الۋدى جوسپارلاعان. تۇركىستان وبلىسى بويىنشا سىبايلاس جەمقورلىققا قارسى قىزمەتپەن ەنگىزىلگەن ۇسىنىمداردىڭ ناتيجەسىندە 29،0 ملن تەڭگەنىڭ نەگىزسىز جۇمسالۋىنا جول بەرىلمەدى.
"تۇركىستان وبلىسىنىڭ ەرىكتىلەرى "سىبايلاس جەمقورلىققا قارسى ۆولونتەرلىك" جوباسى باستالعالى بەرى مەملەكەتتىك ساتىپ الۋ پورتالىنىڭ مونيتورينگىلەۋ بارىسىندا 578،7 ملن تەڭگەنىڭ نەگىزسىز جۇمسالۋىنىڭ الدىن الدى. وسى باعىتتاعى جۇمىس جالعاسۋدا، ءوڭىر تۇرعىندارىن سىبايلاس جەمقورلىققا قارسى ەرىكتىلەر قاتارىنا قوسىلۋعا جانە بيۋدجەت قاراجاتىن جۇمساۋدىڭ تيىمدىلىگىن بىرگە باقىلاۋعا شاقىرامىز"، - دەلىنگەن تۇركىستان وبلىسى بويىنشا سىبايلاس جەمقورلىققا قارسى قىزمەتى ۇسىنعان اقپاراتتا.