40 جىل تەرگەۋشى بولىپ جۇمىس ىستەگەن مەيىرحان مەيىرمانقۇلوۆ بۇل تۋرالى Youtube-تەگى "تيەك" باعدارلاماسىندا ايتتى. وندا ول اتىشۋلى قىلمىستاردى قالاي اشقانىن جانە ساياسي تۇلعالارعا قاتىستى تەرگەۋ جۇمىستارىنىڭ قالاي جۇرگىزىلگەنىن باياندايدى.
سونىڭ ىشىندەگى ەڭ ەلەۋلىسى — دىنمۇحامەد قونايەۆقا قاتىستى قوزعالعان ءىس. مەيىرحان مەيىرمانقۇلوۆتىڭ ايتۋىنشا، قونايەۆتىڭ ۇستىنەن ارىز جازعان ءوزىنىڭ شاكىرتى ەكەن.
"شاكىرتىنىڭ ءوزىنىڭ ۇستازدارىنا قاراي شاپقان كەزدەرى بولدى. ءوزى تىكەلەي شاپپايدى، اينالاسىنداعى ادامدارعا شاپتىرتىپ قويادى. مەن سونى بايقادىم. ايتپەسە، كەيىن كالينينچەنكونىڭ ءوزى ماعان ۇيىمە كەلىپ تۇرىپ قونايەۆ تۋرالى ايتتى عوي، "مەن مىنانداي تازا ىستەگەن ادامدى ومىرىمدە كورگەن ەمەسپىن" دەپ. پەرىشتە دەپ سودان شىقتى عوي ول كىسىنى. بارلىعىنا ايتاتىنىم، مەن سول تەرگەۋگە ماسكەۋدىڭ اتىنان قاتىستىم. دىنمۇحامەد قونايەۆ ومىرىندە كوپ جاعدايدا ەكى ايلىق الىپ وتىرعان. بىرەۋى اكادەميا اتىنان، بىرەۋى ءوزى باسشى بولىپ تۇرعانداعى ايلىعى. اكادەميادان العان ايلىعىن بالالار ۇيىنە اۋدارىپ وتىرعان. ول كىسىنىڭ ءبىر قاسيەتى — تۇبىرتەكتەردىڭ بارلىعىن جيناپ، قاتتاپ وتىرادى ەكەن. سودان كەيىن بۇل كىسى ەش ۋاقىتتا بىرەۋدى جامانداعان ەمەس. سىرتىنان قانشا قارالاپ جاتسا دا، "يت ۇرەدى، كەرۋەن كوشەدى" دەپ جۇرە بەرگەن. ءبىراق مەن ول كىسىنىڭ شاكىرتى "ۇرەدى" دەپ ويلاعان جوقپىن. سول كەزدىڭ وزىندە مەن جامان اسەردە بولدىم"، — دەدى مەيىرحان مەيىرمانقۇلوۆ.
