Taldyqorǵanda «Qamqor» arnaýly áleýmettik qyzmet kórsetý ortalyǵynyń bazasynda 18 jastan asqandar úshin 50 tósek-orynǵa arnalǵan bólimshe ashyldy.
Bul 2023 jyly oblys ákimi Beıbit Isabaevqa «Qamqor» ortalyǵynda tárbıelenip otyrǵan balalardyń ata-analarynyń aıtqan ótinishi boıynsha jasaldy.
Ortalyqtyń aýmaǵyn abattandyrý jumystary júrgizildi, oǵan 12,8 mln.teńge bólindi. Eresekter bos ýaqytyn tıimdi ótkizýi úshin besedkalar, serýen alańy, sahna, vorkaýt alańy jasaldy. Kótergish lıft ornatyldy. Budan bólek, osy jyldyń ekinshi toqsanynda 16 mln. teńgege jýyq qarjyǵa monsha salý josparlanyp otyr. Sondaı-aq 29 mln. teńgege ortalyq tárbıelenýshilerin kedergisiz tasymaldaý maqsatynda kólik satyp alynbaq.
Búgin jańartylǵan ortalyqqa barǵan tárbıelenýshilerdiń ata-analary men jaqyn týystary jasalǵan jaǵdaılarmen tanysty.
Atap ótsek, stasıonary bar «Qamqor» arnaýly áleýmettik qyzmet kórsetý ortalyǵy 3 jastan 18 jasqa deıingi psıhonevrologıalyq patologıasy bar adamdarǵa arnaýly áleýmettik qyzmet kórsetýge arnalǵan.
Osy jyldyń qańtar aıynan bastap ortalyq bazasynda eresekter bólimshesi jumys isteı bastady. Oblystyq jumyspen qamtýdy úılestirý jáne áleýmettik baǵdarlamalar basqarmasynyń derekteri boıynsha búgingi kúni ortalyqta 104 adam qyzmet alady. Onyń ishinde 54-i bala.
Ortalyq aýmaǵynda oıyn, sport, voleıbol alańdary men jylyjaı bar. Sensorlyq, fızıoterapıalyq, defektologıalyq, stomatologıalyq, egý, prosedýralyq, logopedıalyq kabınetter, sondaı-aq psıholog, emdik dene shynyqtyrý, eńbekpen oqytý kabınetteri, májilis zaly bar. Tuz shahtasy, relaksasıa bólmesi jumys isteıdi, mýzyka jáne kásiptik terapıa qoldanylady. Qyzmetkerlerdiń shtattyq sany - 167.
Jalpy oblysta arnaýly áleýmettik qyzmet kórsetetin 13 mekeme jumys isteıdi, onyń 6-ýy – stasıonarlyq, 7-ýi – jartylaı stasıonarlyq mekeme.
Sonymen qatar, múgedektigi bar 18 jastan asqan azamattardyń ata-analyrynyń ótinishteri boıynsha 2024 jyldyń 1-shi aqpanynan Taldyqorǵan qalasynda jartylaı stasıonar jaǵdaıynda qyzmet kórsetetin kúndizgi bolý ortalyǵy óz jumysyn bastaıdy.
