Tiri bolsam, qazaqqa qyzmet etpeı qoımaımyn!

Álıhan Bókeıhan

"Qarýly kúshterden 17 065 áskerı qyzmetshi bosatyldy". Qazaqstan áskeriniń jalaqysy az

31 qańtar 2024 33
Egemendikten keıin Qazaqstan áskeriniń áleýmettik jaǵdaıy nasharlap ketken. Sońǵy 3 jylda 17 myńnan asa áskerı qyzmetker jumystan ketken. Onyń 4 myńnan astamy ofıser. Bul týraly Májiliste qorǵanys mınıstriniń orynbasary Sultan Kamaletdınov aıtty.

Onyń aıtýynsha, 2012 jyly zańmen áskerılerge berilgen kóp artyqshylyq, jeńildik pen tólem joıylǵan. Bul áskerı qyzmetshilerdiń otbasy múshelerine de áser etip, olardyń mártebesin aıtarlyqtaı nasharlatqan. Áskerı qyzmetshilerdiń áskerde turaqtamaýy qorǵanys mınıstrliginiń erekshe alańdaýshylyǵyn týǵyzyp otyr.

Mysaly, buǵan deıin polıgondaǵy jattyǵýlarǵa, issaparǵa kúndelikti ústemeaqysynyń 60% mólsherinde qosymsha qarajat qarastyrylǵan. Sonymen birge, birinshi kelisimshartty jasaý kezinde birjolǵy aqshalaı syıaqy da bolǵan. Biraq qazir ondaı yntalandyrý qarajattary tólenbeıtin bolǵan. Sonymen birge zeınetke shyǵý jasy da uzaryp ketken.
«Tek 2020-2023 jyldar aralyǵynda Qarýly kúshterden 17 065 áskerı qyzmetshi bosatyldy, onyń ishinde 4301-i ofıser jáne kelisimshart boıynsha 12 764 áskerı qyzmetshi. Salystyrý úshin aıtar bolsaq, bul shamamen 15 mehanıkalandyrylǵan brıgadanyń sany», - deıdi Sultan Kamaletdınov.

Buryn Qorǵanys mınıstrligi men Ulttyq qaýipsizdik komıtetiniń balama laýazymdaǵy qyzmetkerleri birdeı jalaqy alypty. Al qazir olaı emes kórinedi. Mundaı jalaqy jastardy áskerı qyzmet atqarýǵa yntalandyrmaıdy. Tipti soǵys ýaqytynda da jaǵdaıdy qıyndatýy múmkin ekenin atap ótti.

Qorǵanys mınıstrliginde qatardaǵy atqyshtyń jalaqysy 89 211 teńge bolsa, ulttyq qaýipsizdik komıtetinde 185 855 teńge. Qorǵanys mınıstrliginde vzvod komandıri – 231 159 teńge alsa,ulttyq qaýipsizdik komıtetine – 335 857 teńge jalaqy alady. Qorǵanys mınıstrliginde rota komandırine 275 675 teńge, Ulttyq qaýipsizdik komıtetindegi shekara departamentiniń bastyǵyna 371 637 teńge jalaqy tólenedi.
Bul maqala týraly ne oılaısyz?