Prezıdent Vladımır Zelenskıı Ýkraınany Eýropa Odaǵyna (EO) múshe qylyp engizý týraly ótinishke qol qoıdy. Bul týraly memleket basshysynyń ózi "Telegram-kanalyna" jazyp, qol qoıý kezi jáne qujattyń sýretin jarıalady.
Aryz Eýropa komısıanyń prezıdenti Ýrsýla fon der Láıenge jazyldy. Qujattyń qashan qaralatyny belgisiz. Osyǵan deıin ólkeniń premer-mınıstri Denıs Shmygal Ýkraına uıymǵa arnaıy tártippen kiretinin bildirgen.
Osyǵan deıin Zelenskıı vıdeo úndeý jasap, Eýropa Odaǵyna shuǵyl túrde Ýkraınany qosýdy suraǵan. Ol ýkraın armıasy óz jeri úshin ǵana emes, jalpy Eýropa úshin soǵysyp jatqanyn aıtyp, "uıymǵa kirýge laıyqty" ekenin jetkizgen.
Reseı prezıdenti Vladımır Pýtınniń "Donbastaǵy halyqty qorǵaý" týraly málimdemesinen keıin orys áskeri 24 aqpanda Ýkraınaǵa basyp kirdi. Bes kúnnen beri Reseı Ýkraınanyń barlyq aımaqtaryn atqylap bombalap jatyr.
Ýkraınanyń aqparat quraldary Reseıdiń shabýylynan 352 beıbit turǵyn qaza bolǵanyn, olardyń ishinde balalar bar ekenin jazyp jatyr. Oqıǵanyń alǵashqy kúni Kıev 137 sarbaz qurban bolǵanyn málimdedi. Odan keıin jaǵdaı belgisiz.
Ýkraına qorǵanys mınıstrligi Reseı 5300 sarbazyn joǵaltty dep málimdegen. Bul sanattyń ishinde qaza tapqandar, tutqynǵa túskender jáne jaralanǵandar kiredi.
Reseı bolsa naqty qansha áskerin joǵaltqany jóninde resmı málimet bermeı otyr.
