Eks-prezıdenttiń úlken qyzy Darıǵa Nazarbaeva májilisten ketedi. Bul jóninde 25 aqpanda Zakon.kz saıty habarlady.
"Búgin májilis depýtaty ókiletinen bas tartý týraly sheshim qabyldadym jáne kúsh-jigerimdi qoǵamdyq, gýmanıtarlyq, mádenı jáne qaıyrymdylyq qyzmetke jumsaımyn" dep jazylǵan málimdemede.
Onda ol "Nur Otan'ǵa daýys bergen" qazaqstandyqtarǵa, partıa múshelerine jáne el bıligine "ózine artqan senimi úshin" alǵys bildirgen. Ol málimdemede óziniń ketý sebebin túsindirmegen. Qańtar oqıǵasyn "jan-jaqty muqıat" zertteý qajettigin atap ótip, "kináliler ádil jazalanýy tıis, kinásizder bosatylýy kerek" dep jazǵan. Qandy qyrǵynnan "sabaq alý" qajettigin alǵa tartqan.
Májilistiń baspasóz qyzmeti Nazarbaevanyń ketetinin rastaǵanmen depýtattyń kómekshisine habarlasýǵa keńes berdi.
Eks-prezıdenttiń úlken qyzy Darıǵa Nazarbaeva qańtar oqıǵasynan beri jurt aldyna shyqpady. 12 qańtarda kómekshisi onyń koronavırýsqa shaldyqqanyn, Almatydaǵy úıinde ekenin aıtqan. Nazarbaevamen baılanysy bar delingen Zakon.kz saıty 17 qańtarda kómekshisine súıene otyryp, eks-prezıdenttiń qyzy aqysyz demalysta ekenin jazdy. Aqparatqa qaraǵanda, onyń demalys merzimi aqpan sońynda bitedi.
Osyǵan deıin Nazarbaeva "Nur Otan" partıasynyń saıası keńes quramyna enbegen edi.
Qańtar oqıǵasynan keıin burynǵy prezıdent pen qazirgi prezıdenttiń jaqtastary arasynda elıta aralyq tartys órshigeni týraly boljam keń taraǵan. İzinshe eks-prezıdenttiń týystary men aınalasyndaǵy sheneýnikter birinen soń biri qyzmetterinen kete bastady. 18 qańtarda qańtar oqıǵasynan keıin alǵash ret vıdeomálimdeme jasaǵan eks-prezıdent Nursultan Nazarbaev "elıta aralyq tartysty" joqqa shyǵaryp, bas bılik Toqaevtyń qolynda ekenin, óziniń qarapaıym "zeınetker" ekenin aıtqan.
