Indýstrıa jáne ınfraqurylymdyq damý mınıstri Qaıyrbek Óskenbaev 22 aqpan kúni aqparat quraldaryna bergen suhbatynda "elde ýtılızasıa alymyna baılanysty kólik arzandaıdy" degen boljamdy joqqa shyǵardy.
– Halyq ýtılızasıa alymyn alyp tastasa nemese azaıtsa, kólik arzandaıdy dep oılap otyr. Statısıkaǵa qaraıyqshy. Mysaly, ózimizde shyqqan kólikterge bir tıyn ýtılızasıa alymy tólenbeıdi. Byltyr 105 myń jeńil kólik satylsa, 64 paıyzy otandyq ónimder. Olarǵa ýtılızasıa alymy tólengen joq. Traktor boıynsha 89 paıyzy – óz ónimimiz, avtobýstardyń 74 paıyzy ózimizde shyǵarylǵan. Iaǵnı ýtılızasıa alymyn azaıtsa da, kóbeıtse de olardyń baǵasy sol kúıinde qalady. Al shetelden keletin [kólikter] baǵasy da arzandamaıdy dep oılaımyn. Sebebi olar (óndirýshiler men satýshylar – red.) erteńgi kúni baǵany túsiretinin bilip, baǵasyn kemitpeıdi. Tek olardyń óz qaltasyna túsetin aqsha kóbeıer, al baǵasy sol kúıinshe qalady, - dedi mınıstr.
Qańtar oqıǵasynan keıin prezıdent Qasym-Jomart Toqaev ýtılızasıa alymyn jınaýmen jeke kompanıa emes, memlekettik organ aınalysýy kerek dep málimdep, eks-prezıdenttiń kishi qyzy Álıa Nazarbaevamen baılanysty "Operator ROP" kompanıasyn jabýdy tapsyrǵan. Artynsha onyń fýnksıasy "Jasyl damý" aksıonerlik qoǵamyna júktelip, aqpan aıynyń basynda ýtılızasıa alymyn qabyldaı bastaǵan.
26 qańtarda "Operator ROP" kompanıasynyń tóraǵasy Medet Qumarǵalıevtiń "jemqorlyq" boıynsha ustalǵany belgili boldy.
Elde byltyrdan beri ýtılızasıa alymyn azaıtýdy nemese múlde alyp tastaýdy talap etken júrgizýshiler narazylyǵy kóbeıgen shaqta ındýstrıa jáne ınfraqurylymdyq damý mınıstrligi qańtarda ýtılızasıa alymyn jańa ádis boıynsha esepteıtinin habarlaǵan. 22 aqpanda ekologıa mınıstri Serikqalı Brekeshov onyń kólemi 23 aqpanda belgili bolady dep málimdedi.
