Áli de kesh emes. Rámizder kúnine aıryqsha mán berýimiz qajet. Joǵaltyp alǵan Respýblıka kúnin oralttyq qoı. Egemendik Deklarasıasy qabyldanǵan kúnniń mańyzyn qaıta baǵamdaı bastadyq. Eltańbany dáripteýge de solaı kóńil bólgen durys.
Qazir qazaqstandyqtar shetelge kóp shyǵady. Múmkindik mol. Sol shetelge shyqqan azamat Qazaqstannyń rámizderin, Eltańbasyn kórsetip, maqtanatyndaı bolýy kerek. Onyń joldary kóp. Memleket basshysy jastarǵa únemi úmit artatynyn aıtyp, bizdiń ul-qyzdarymyzǵa jiger berip júr. Qazaqtyń jastary óte talantty, olar Eltańbany qalaı nasıhattaýdyń úlgisin oılap tabady dep oılaımyn. Kreatıvti ekonomıkamen aınalysyp júrgen jastarymyz da kóp, olar da osy iske jumylady dep senemin.
Memlekettik Eltańba – halqymyzdyń tarıhy men mádenıetiniń belgisi. Jańashyl elimizdiń temirqazyqtaı berik negizi, asyl muraty. Sondyqtan oǵan qalaı bolsa solaı qaramaýymyz kerek. Álemde patrıotızmniń qanshama úlgisi bar. Nege úlgi almasqa? Bizdiń halqymyzdyń da ózindik dúnıetanymy qalyptasqan. Ol – dalalyq órkenıet. Bálkim, osyny negizge ala otyryp, zamanaýı ulttyq ıdeologıany qalyptastyrýymyz kerek shyǵar?! Menińshe, biz bul máseleni qoǵam bolyp kótergenimiz jón. Tipti, Ulttyq quryltaıda da osy jaǵdaı talqylanýy tıis.
Biz ótken otyz jyl ishinde «aldymen ekonomıka, ózgesi keıin» degen ustanymdy alǵa qoıyp, biraz dúnıemizdi joǵalttyq. Eń aldymen senimnen aıyryldyq. Memlekettik Rámizderge qurmettiń tómendeýiniń bir sebebi de osynda ma deımin. Prezıdentimiz jańa jyldyń basynda baspasózge bergen suhbatynda «Biz ozyq oıly ult retinde tek qana alǵa qaraýymyz kerek» degendi aıtty. Zıaly qaýym, jańashyl jastar osy uǵym aıasynda oı biriktirse, usynys-pikirlerin ortaǵa salsa jańa ıdeologıanyń negizi qalanar edi.
Hanbıbi Esenqaraqyzy,
aqyn, QR eńbek sińirgen qyzmetkeri
