2024 jyldyń 12 aqpany men 24 sáýiri aralyǵynda barlyq oblys ortalyqtarynda aldyn ala irikteý kezeńi ótedi. İrikteý ótkiziletin kún, ýaqyt jáne oryn týraly aqparat Akademıanyń balletacademy_kz áleýmettik jelilerindegi resmı akkaýnttarynda ornalastyrylady.
Joldama alǵan balalar úshin qabyldaý emtıhandary 2024 jyldyń maýsym-shilde aılarynda ótedi.
4-synyp oqýshylary horeografıalyq óner boıynsha beıindik daıarlyǵy bar óner salasyndaǵy mamandandyrylǵan mektepte dáris alady. Al 5-synypqa qabyldanǵan balalar – kásiptik bilim beretin mektep-kolledjinde «Balet ártisi» biliktiliginiń «Horeografıa óneri» mamandyǵy boıynsha oqıdy. Oqý kezeńi - 7 jyl 10 aı.
Akademıanyń bilim alýshylary sońǵy úsh jyl ishinde 54 halyqaralyq baıqaýǵa qatysyp, 100-den asa marapatqa ıe boldy.
Horeografıa akademıasynyń kolejinde 2017 jyldan bastap «Balet ártisi» biliktiliginiń «Horeografıa óneri» mamandyǵy boıynsha 100 adam, «Bı ansambliniń ártisi» biliktiligi boıynsha 74 adam bilim aldy.
Akademıa túlekteri otandyq teatr ártisteriniń qataryn tolyqtyrdy. Olardyń qatarynda «Astana balet» jáne «Astana Opera» teatrlarynyń jetekshi balet ártisteri Shuǵyla Ádephan, Sultanbek Ǵumar, Rýstam Chahalov, Safıa Ádilhanova, sondaı-aq halyqaralyq baıqaýlardyń jeńimpazdary, Umaı ulttyq syılyǵynyń «Jyl jańalyǵy» jáne «Úzdik balet oryndaýshysy» nomınasıalarynyń ıegerleri bar.
