Reseı prezıdenti Vladımır Pýtın "Donesk jáne Lýgansk halyq respýblıkalarynyń táýelsizdigin" moıyndaý týraly sheshim qabyldaǵannan keıin Ýkraına bas prokýratýrasy qylmystyq is qozǵady. Bul jóninde 21 aqpanda Facebook paraqshasynda Ýkraına bas prokýrory Irına Venedıktova habarlady.
Onyń sózine qaraǵanda, bılik ókiliniń memleket shekarasyn ózgertý týraly úndeýine tyıym salatyn Ýkraına qylmystyq kodeks baby boıynsha is qozǵalǵan.
"Bizdiń prokýrorlar osy iske bel sheship kirisedi. Bul jabyq klýb músheleri shekaraǵa shopıng jasaýdan qalady – ýáde beremiz" dedi Venedıktova.
Ol máselege "emosıamen" túsinikteme bere almaıtynyn, al zań boıynsha bas prokýroratýra keńsesi "qylmysty tirkep, prosesýaldyq isterdi júrgizý isine jaýapty" ekenin aıtty.
Dúısenbi kúni Reseı Ýkraına shyǵysyndaǵy separatıstik respýblıkalardyń táýelsizdigin moıyndap, ol jaqqa ásker jiberý týraly sheshim qabyldaǵannan keıin 22 aqpanǵa qaraǵan túni Ýkraına prezıdenti Vladımır Zelenskıı halyqqa úndeý joldady. Ol Reseıdiń áreketi men málimdemesine qaramastan Ýkraınanyń halyqaralyq dárejede moıyndalǵan shekarasy ózgermeıdi dedi.
"Basyp alynǵan Donesk men Lýgansk oblystarynyń táýelsizdigin moıyndaý bul Reseıdiń birjaqty túrde Mınsk kelisiminen ketkenin kórsetedi. Bul beıbitshilik is-qımyldary men kelissóz formatyna nuqsan keltiredi. Búgingi jáne erteńgi yqtımal sheshimderi arqyly Reseı 2014 jyldan beri is júzinde Donbasta bolǵan áskerin zańdastyrady. Segiz jyl boıy soǵysqa dem bergen memleket ózi aıtqan beıbitshilikti qamtamasyz ete almaıdy" dedi Zelenskıı.
Ol EQYU aıasynda arnaıy jıyn men Norman tórttigi formatyndaǵy shuǵyl otyrys ótetinin habarlady.
Ýkraına syrtqy ister mınıstri Dmıtrıı Kýlebanyń aıtýynsha, Ýkraına BUU Qaýipsizdik keńesiniń shuǵyl otyrysyn ótkizýge ótinish bergen.
