"Qazaqstan múshe bolyp tabylatyn Ujymdyq qaýipsizdik sharty uıymynan Ýkraına shyǵysyndaǵy separatıstik respýblıkalar aýmaǵyna ásker jiberilýi múmkin be?" degen suraqqa Qazaqstan syrtqy ister mınıstri Muhtar Tileýberdi "joq" dep jaýap berdi.
– UQSHU jarǵysy ásker men bitimgershilik kúshterdi paıdalanýdy qatań shekteıdi. Olar tek UQSHU aýmaǵynda ǵana (oǵan Reseı, Armenıa, Qazaqstan, Belarýs, Qyrǵyzstan, Tájikstan múshe – red.) paıdalanyla alady. Ózderińiz bilesizder, jýyrda UQSHU bas hatshysy bitimgershilik kontıngentti "Donesk halyq respýblıkasy" men "Lýgansk halyq respýblıkalaryna" jiberý yqtımaldyǵy týraly máselege túsinikteme berdi. Onyń aıtýynsha, bul is júzinde múmkin emes. Ony jiberý úshin arnaıy rezolúsıa bar, BUU qaýipsizdiginiń arnaıy mandaty bar. Sol sebepti bul másele [kún tártibinde] turǵan joq, – dedi mınıstr.
Ótken aptada májilis Reseımen áskerı yntymaqtastyq ornatý týraly kelisimdi ratıfıkasıalaǵan. Seısenbi kúni jýrnalıser mınıstrge "osy kelisimge sáıkes, Qazaqstan Reseıge áskerı kómek jiberýi múmkin be?" degen suraq qoıdy.
"Atalǵan kelisim tek áskerı-tehnıkalyq yntymaqtastyqty qarastyrady" dedi mınıstr. "Eń birinshiden, ol áskerı tehnıkany satyp alý, birge áskerı jattyǵýlar ótkizý, sondaı sharalardy kózdeıdi" dep jaýabyn naqtylady.
Bir kún buryn Reseı prezıdenti Vladımır Pýtın Ýkraına shyǵysyndaǵy separatıstik respýblıkalardyń táýelsizdigin moıyndaý týraly qaýlyǵa qol qoıyp, ásker jiberý týraly buıryq bergen. NATO Reseıdiń sheshimin aıyptap, Máskeý "Ýkraına shyǵysyndaǵy qaqtyǵysty ýshyqtyryp, Ýkraınany basyp alýǵa syltaý izdep otyr" dep málimdedi. BUU Reseıdiń separatıstik respýblıkalar táýelsizdigin moıyndaý týraly sheshimine alańdaýshylyq bildirip, Ýkraına tutastyǵyn qoldaı beretinin málimdedi.
Ýkraına prezıdenti Vladımır Zelenskıı "máseleni dıplomatıalyq jolmen retteý saıasatyn ustanyp, arandatýǵa ermeımiz" dep málimdedi. "Ýkraınanyń óz shekarasyn qorǵaýǵa quqyǵy bar" dedi ol. Ýkraına bas prokýratýrasy "bılik ókiliniń memleket shekarasyn ózgertýge shaqyrýyna tyıym salatyn" bap boıynsha qylmystyq is qozǵalǵanyn habarlady.
