Ýkraına barlaý qyzmetiniń jetekshisi general Kırıl Býdanov Reseı basshysy Vladımır Pýtınniń syrqat ekenin aıtty. Onyń aıtýynsha, Pýtınniń saıasatymen kelispeıtin bıliktiń eń joǵarǵy eshelonynda otyrǵandar ony saıasattan tyqsyrýǵa daıyndalyp jatyr. Bul jóninde Býdanov brıtandyq Sky News telearnasyna bergen suhbatynda aıtty. Ýkraına barlaý basqarmasy basshysynyń aıtýynsha, Pýtın onkologıalyq aýrýmen aýyrady. Ol Pýtınniń densaýlyǵy jaıly tujyrymyn nege súıenip aıtqanyn naqtylamady.
Býdanov Ýkraınadaǵy soǵys jyl sońyna deıin jalǵasady, eń sheshýshi kezeń tamyz aıynda bolady dep boljaıdy. Ýkraına barlaý qyzmeti jetekshisiniń aıtýynsha, nátıjesinde Ýkraına qazir aıyrylyp alǵan aýmaqtardy, onyń ishinde Donbass pen Qyrymdy da ózine qaıtarady.
The Times basylymy senbi kúni Vladımır Pýtınniń densaýlyǵy jaıly materıal jarıalady. Basylym reseılik olıgarh pen batys ınvestory arasyndaǵy aýdıoáńgimege súıenedi. Amerıkalyq New Lines tilshileriniń qolyna túsken áńgimede reseılik bıznesmen Pýtınniń qan obyryna shaldyqqanyn aıtady. Reseılik olıgarhtyń sózinshe, Ýkraınany shabýyldaýǵa buıryq bergen Reseı prezıdenti "aqylynan adasqan", ol osylaısha Reseı ekonomıkasyn kúıretip jatyr. Olıgarhtyń aty-jóni atalmaıdy.
Osyǵan deıin Reseıden ketken mıllıarder Oleg Tınkov jýrnalıs Iýrıı Dýdqa bergen suhbatynda reseılik mıllıarderlerdiń basym bóligi Ýkraınadaǵy soǵysqa qarsy ekenin aıtqan.
"Proekt" basylymy jýyrda Vladımır Pýtınniń densaýlyǵy jaıly zertteý jarıalap, onyń onkologıalyq aýrýdardy emdeıtin hırýrg dárigerlerge birneshe ret qaralǵanyn jazǵan. Zertteý júrgizgender Pýtınniń byltyr qyrkúıekte aıaq asty oqshaýlanǵanyn, odan keıin ol álem lıderleri ıa úkimet múshelerimen kezdeskende óte alysta otyratynyn ańǵarǵan. Jýyrda qoldanýshylar Pýtınniń qorǵanys mınıstri Sergeı Shoıgýmen kezdesý kezindegi "erekshe qımylyna" nazar aýdarǵan.
Kreml Pýtınniń densaýlyǵyna baılanysty túsinikteme bermeıdi nemese prezıdenttiń densaýlyǵy jaqsy deýmen shekteledi. Pýtın jurt aldyna sırek shyǵady, alaıda osy aptada Máskeýde 9 mamyrda ótken áskerı parad jáne ózge de sharalarǵa qatysqan.
Vladımır Pýtın 69 jasta. Onyń bastamasymen qabyldanǵan Konstıtýsıa túzetýlerine sáıkes qaıta saılansa, bılikte 2036 jylǵa deıin qala qalady.
