Tiri bolsam, qazaqqa qyzmet etpeı qoımaımyn!

Álıhan Bókeıhan

Túrkistanda túbi bir túrki jurtynyń geograftary bas qosty

21 sáýir 2024 271

Túrkistan qalasynda, Iasaýı atyndaǵy Halyqaralyq qazaq-túrik ýnıversıtetinde Túrki áleminiń birinshi halyqaralyq  geografıa kongresi ótti. Bul týraly Túrkistan oblysy ákiminiń baspasóz qyzmetine silteme jasap alash.kz habarlaıdy.

Jıynǵa Qazaqstan, Túrkıa, Ózbekstan, Qyrǵyzstan, Reseı túrki tildes elderden 200-ge jýyq ǵalym men zertteýshiler, óńirdegi mektep oqytýshylary, ýnıversıtet ujymy men stýdentteri qatysty.

Túrkistan oblysy ákiminiń birinshi orynbasary Zulpyhar Joldasov arnaıy qatysyp, óńir basshysy Darhan Satybaldynyń quttyqtaý hatyn jetkizdi.

Al ýnıversıtet rektory Janar Temirbekova kelgen qatysýshylarǵa alǵysyn bildirdi. Ál-Farabı atyndaǵy Qazaq Ulttyq ýnıversıtetiniń Basqarma tóraǵasy – rektory Janseıit Túımebaevtyń atynan atalǵan oqý ordasynyń ókilderi de quttyqtaýyn jetkizdi.

Úsh kúnge ulasqan kongres barysynda «Túrkistan oblysynyń geografıasy» oqý quralynyń jáne «Túrki tildes elder geografıasy» oqýlyǵynyń 4-shi basylymynyń tusaýkeseri ótti. Sondaı-aq, saıasattaný ǵylymdar doktory, profesor Muhıt-Ardager Sydyqnazarov «Qazaq memlekettiliginiń tarıhy – kóne kartalarda» atty ashyq leksıa ótkizdi.

Jıynnyń mańyzdy oqıǵalarynyń biri – Ahmet Iasaýı ýnıversıtetiniń bazasynda «XI-XIX ǵǵ. Eýropalyq jáne shyǵys kartalaryndaǵy túrki memleketteri» atty Galereıanyń saltanatty ashylý rásimi boldy.

Tanymal kartograf-ǵalym Muhıt-Ardager Sydyqnazarovtyń uzaq jyldarǵa sozylǵan zertteý nátıjesi retinde ashylǵan galereıada Qazaqstan, Túrkıa, Ázirbaıjan, Túrkmenstan, Qyrǵyzstan jáne Ózbekstan elderiniń ejelgi Eýropa jáne shyǵys kartalaryndaǵy mańyzy men orny kórsetilgen.

Ol Qazaqstan ǵana emes, kúlli túrki tildes elderdiń tarıhynan syr shertetin kartalar galereıasy alǵash ret ýnıversıtet bazasynda ashylǵanyn atap ótti. Budan bólek, kongres aıasynda ál-Farabı atyndaǵy QazUÝ-dyń Geografıa jáne tabıǵatty paıdalaný fakúltetiniń ǵylymı kórmesi uıymdastyryldy. Kongreske jınalǵan ǵalymdar 6 seksıaǵa bólinip, negizgi taqyryp aıasynda pikir men tájirıbe almasty.

Aıta keteıik, kongrestiń negizgi maqsaty ‒ Eýrazıa materıgindegi ulan-ǵaıyr aımaqta qonystanǵan Túrki tildes elderdiń ǵalymdary arasyndaǵy yntymaqtastyqty nyǵaıtyp, geografıalyq zertteýlerdiń damýyna yqpal etý. Atalǵan is-sharany Ahmet Iasaýı atyndaǵy Halyqaralyq qazaq-túrik ýnıversıteti, ál-Farabı atyndaǵy Qazaq ulttyq ýnıversıteti, Geografıadan Respýblıkalyq ataýly mektep jáne Geografıa jáne sý qaýipsizdigi ınstıtýty uıymdastyrǵan.

Bul maqala týraly ne oılaısyz?