Qazaqstan prezıdenti Qasym-Jomart Toqaev 26 sáýirde "Amanat" (burynǵy "Nur Otan" partıasy) sezinde partıadan shyǵatynyn jáne tóraǵalyǵynan bas tartatynyn málimdedi. Ol muny ózi bastamashyl bolyp ózgertip jatqan Konstıtýsıadaǵy ózgeristermen baılanystyrdy. Toqaev partıa tóraǵalyǵyn májilis spıkeri Erlan Qoshanovqa tapsyratynyn aıtty.
Buǵan qosa, sıeze bılikshil "Adal" partıasy "Amanatqa" qosylatynyn jarıalady.
Májilistegi basym orynǵa ıe "Amanat" partıasyna keıingi jyldary qoǵamda syn kúsheıgen. Kemi 238 adamnyń ómirin qıǵan Qańtar oqıǵasynan soń partıanyń saıası keńes quramy, saıası búro músheleri aýysyp, ataýy "Nur Otannan" "Amanatqa" aýysqan edi.
28 qańtarda partıa sezinde eldiń eks-prezıdenti Nursultan Nazarbaev partıa tóraǵalyǵyn qazirgi prezıdent Toqaevqa tapsyrǵan edi. Sol sıeze Toqaev el prezıdenti partıa músheliginde jáne tóraǵalyǵynda bolmaý keregin aıtyp, túbi tóraǵalyqty ótkizip beretinin jetkizgen.
"Nur Otan" bastapqyda 1999 jyly "Otan" degen atpen qurylǵan. 2006 jyly jeltoqsanda ataýy "Nur Otan" bolyp ózgertilgen edi. Eldi 30 jyldaı basqarǵan Nazarbaev bul partıanyń uzaq jyldar boıy tóraǵasy bolyp kelgen. 2019 jyly naýryzda Nazarbaev prezıdenttikten ketkenimen, partıa tóraǵasy retinde bılikke yqpal etip kelgen edi.
Sarapshylar Qańtar oqıǵasy Nazarbaevtyń bılikke yqpalyn álsiretti deıdi. Qańtar qyrǵynynan soń Toqaev elde saıası jáne áleýmettik reforma jasaýǵa ýáde etken edi. Al sarapshylar Qańtar oqıǵasynan tórt aı ótse de elde aıtarlyqtaı saıası jáne áleýmettik reforma bolǵan joq dep sanaıdy.
