BTA banktiń basshysy Erjan Tátishevti Muhtar Áblázovtiń tapsyrmasymen óltirdi dep aıyptalyp, uzaq jylǵa sottalǵan túrmedegi kásipker Murathan Toqmadı Tátishevtiń ólimine Áblázovtyń qatysy joǵyn málimdedi. 9 naýryzda onyń Jezqazǵan túrmesinen jazǵan hatyn aqparat quraldary jarıalady. Bul hatty Azattyq tilshisi de kórdi. Hattyń Toqmadı atynan jazylǵanyn áıeli Jámıla Aıymbetova-Toqmadı rastady.
Prezıdent Qasym-Jomart Toqaevqa arnap jazǵan hatynda Murathan Toqmadı ózin azaptap, kináni moıyndatýǵa májbúr bolǵanyn aıtqan. Ol ózi men jaqyndary, áriptesteri men dostaryna jasalǵan "quqyqtyq vandalızmge" qańtar basynda aýyr bap boıynsha qamalǵan UQK-nyń burynǵy tóraǵasy Kárim Másimov ("memleketke opasyzdyq jasaý" baby boıynsha aıyptalǵan, qazir tergeý ızolátorynda otyr) bastaǵan kúshtik qurylymdardy kinálaıdy.
"Qoqan-loqy, soqqy, azaptaý, otbasyna moraldyq-psıhologıalyq qysym kórsetý, 20-30 jyl burynǵy qylmystyq isti burmalaý, joldasyma qarsy úsh qylmystyq is ashý, týysymdy qamaý, bıznesti buǵattaý, múlikke tyıym salý jáne otbasynyń esepshotyn buǵattaý jáne ózge de ádis-tásilder arqyly meni kináni moıyndap, prosesýaldyq kelisimge (PK) qol qoıýǵa kóndirdi. Olardyń sharty boıynsha men: 1) 2004-2005 jyldary burynǵy áriptesim S.A. Nepropekınniń múlki men úlesin bopsaladym dep; 2) Erjan Tátishevti Muhtar Áblázovtyń tapsyrysy boıynsha óltirdim dep moıyndaýǵa tıis boldym" deıdi Toqmadı hatynda.
Toqmadıdiń jazýynsha, ony "prosesýaldyq kelisimge" qol qoıǵyzý úshin tek azaptap qana qoımaı, Almatydaǵy psıhıatrıa bólimine de jatqyzǵan.
"Tórt aı boıǵy osyndaı "rejımnen" keıin jáne meniń áıelimdi 15 jylǵa otyrǵyzyp, al kishi balalarymdy balalar úıine jiberemiz dep qoqan-loqy jasaǵannan keıin 2017 jyly 18 qarashada prosesýaldyq kelisimge qol qoıýǵa májbúr boldym. 2018 jyly 16 naýryzda Taraz sotynyń sýdıasy M.Tilepov úkimdi oqyǵan kezde "sizdiń prosesýaldyq kelisimińiz iste bar, kináli adamǵa úkim shyqqannan keıin kúshine enedi" dep aıtqan. Áblázovqa 2018 jyly 27 qarashada úkim oqyldy. Bir jyldan soń 2019 jyly qarashada otbasymnyń birneshe ret jazǵan málimdemesine, atap aıtqanda prosesýaldyq kelisimdi qoldanyp, jumsaǵyraq jaza qoldaný týraly ótinishine jaýap bergen Jambyl oblysynyń prokýrory J.K.Qusaıynov "Taǵaıyndalǵan merzimniń ózi eń qysqa merzim" dep málimdedi. Osylaısha bizdiń "prosesýaldyq kelisim – ánsheıin aldaý" degen áý bastaǵy boljamymyz rastaldy" dep jazdy hatta.
Ol hattyń sońynda ózi "jasamaǵan qylmys úshin" túrmede otyrǵanyn alǵa tartyp, kúshtik qurylymnyń sol kezdegi basty maqsaty – "Nursultan Nazarbaevtyń qas jaýy Muhtar Áblázovtyń ekstradısıasy edi, alaıda qańtarda olardyń bári ustaldy" dep jazdy.
Ol Toqaevtan isti qaıta qarap, ózin aqtap, bosatýdy suraǵan.
9 naýryzda qýǵyndaǵy burynǵy bankır Muhtar Áblázov Toqmadıdiń hatyna baılanysty reaksıa bildirdi. Ol qazirgi bılik úshin Toqmadıdiń haty "tamaqqa qadalǵan súıekteı" áser etetinin aıtyp, biraq kásipkerdiń haty jaýapsyz qalady dep sanaıtynyn jazdy. Bılik ókilderi ázirge reaksıa bildirmedi.
Erjan Tátishev 2004 jyly ańshylyqta júrgende oq tıip ólgen. Sol kezde muny sot "jazataıym oqıǵa" dep tanyp, bankırdiń janynda birge bolǵan kásipker Murathan Toqmadıdi bir jylǵa sottaǵan. Biraq 2017 jyly is qaıta qaralyp, Murathan Toqmadı "Tátishevti "TuranÁlem" bankin ıelenýdi kózdegen Muhtar Áblázovtiń tapsyrysymen óltirdim" degen. Sot ony 2018 jyly on jarym jylǵa sottaǵan.
