Tiri bolsam, qazaqqa qyzmet etpeı qoımaımyn!

Álıhan Bókeıhan

Sýdan zardap shekken jandardyń dúnıe-múlkiniń qalaı baǵalanatyny týraly belgili boldy

23 sáýir 2024 177

Soltústik Qazaqstan oblysy Qyzyljar aýdanynda tabıǵı apattan zardap shekken turǵyndardyń shyǵyny eseptele bastady. Qazir mamandar sýda qalǵan baspanalar men dúnıe-múlikti zerttep, baǵalap jatyr. Bul týraly Qyzyljar aýdany ákimdiginiń baspasóz qyzmeti habarlady. 

SQO-da sý tasqynynyń zardabyn Qyzyljar aýdany eń kóp tartty. Jergilikti ákimdiktiń málimetinshe, aýdan boıynsha 1485 úı sýǵa ketti. Onyń 197-si – Beskól aýylynda. Qazirgi ýaqytta tasqyn sýdyń beti qaıtqan. Turǵyndardyń keıbiri úılerine kirýge múmkindik aldy.

«13 sáýir kúni sý keldi. Úıdiń qabyrǵasynan-aq kórýge bolady, sý bir metrden astam kóterildi. Al úıdiń ishinde bıiktigi 10-15 sm-deı boldy. Soǵan qaramastan dúnıe-múlikke zıan keldi. Jańa úı, 2018 jyly ǵana kirgen edik. Jóndeý qajet, tehnıkamyz isten shyqty. Qazir maman tehnıkalyq zertteý júrgizip, kelgen shyǵyndy baǵalap jatyr. Tańerteń habarlasyp, ótinish tastadym, keshke keldi», - deıdi Beskól aýylynyń turǵyny Ermek Maýytov.

«Búginge deıin 100-den astam úı qaraldy. Sý ketken baspanalarǵa tehnıkalyq zertteý júrgizip jatyrmyz. Eshkim umyt qalmaıdy, bul jumysty tez arada aıaqtaýdy josparlap otyrmyz. Eń aldymen zaqymdanǵan múlikti qarap, sýretke túsiremiz. Edenderin, qabyrǵalaryn kóremiz, elektrıkasyn qaraımyz. Turmystyq tehnıkaǵa servıs ortalyqtan servıstik qorytyndy kerek bolady, onyń isten shyǵyp, qalpyna keltirýge bolmaıtyndyǵy jóninde. Iaǵnı sýdan búlinse, baǵalaý úshin servıstik ortalyqtyń qorytyndysy qajet. Óıtkeni biz ondaı qorytyndy bere almaımyz», - deıdi «Grýppa kompanıı Ak bars-Fınans» JSHS bas dırektory Mıdhat Fashýtdınov.

 

Bul maqala týraly ne oılaısyz?