Qazaqstandyq álpınıser komandasy Kazakh Everest Team sporttyq-patrıottyq ekspedısıasy aıasynda Everest shyńyna shyǵýdy josparlap otyr, dep habarlaıdy alash.kz Ulttyq olımpıadalyq komıtetke silteme jasap.
Ekspedısıany álemge tanymal álpınıs Maqsut Jumaev basqarady. Ol óz mansabynda segiz myń metrlik 14 shyńdy baǵyndyrǵan. Onyń toby jeti adamnan quralǵan. İshindegi jalǵyz áıel adam – Anar Býrasheva.
Qazirgi tańda komanda sońǵy daıyndyq kezeńin ótkerýde. Jaqynda álpınıser klımatqa beıimdelý maqsatynda Gımalaıdaǵy alty myń metrlik shyńdardyń birin baǵyndyrǵan. Endi olar bıiktigi jóninen úshinshi lagerge kóterilip, keıin Everestke jol tartpaq.
«Joba aıasynda biz alty myń metrlik Aılend-Pık shyńyna shyqtyq. Bul Everesttiń mańynda. Denemiz joǵary gıpoksıa jaǵdaıyna úırenisip, klımatqa beıimdelý úshin osy qadamǵa bardyq. Qazirgi tańda Everesttiń bazalyq lagerindemiz. Túrli daıyndyq kezeńderinen ótip jatyrmyz. Atap aıtar bolsam, Kýmbý muzdyǵynda daıyndalýdamyz. Klımatqa beıimdelýdiń sońǵy kezeńinen ótý úshin úshinshi bıiktik lageri qurylǵanyn kútýdemiz. Sol jerde túnep, keıin demalý úshin tómenge túsemiz. Barlyq qazaqstandyqtar úshin osy shyńdy baǵyndyratymyzǵa senemin. Anardyń barlyq qyzǵa úlgi bolǵanyn qalaımyn. Osy saparymyz arqyly eńbek jolynda júrgen barlyq sportshylar men olımpıadashylardy qoldaǵymyz keledi, - dedi Maqsat Jumaev.
