Tiri bolsam, qazaqqa qyzmet etpeı qoımaımyn!

Álıhan Bókeıhan

"Shetel ınvestory baılyǵymyzdy alyp, adamdardy kómip kete bere me?". Maıqaıyńda tabylmaı jatqan kenshilerdiń jaqyndary Astanaǵa bardy

01 sáýir 2024 281

Keshilerdiń jaqyndary Astanaǵa bardy. Pavlodar oblysy Maıqaıyń altyn ken ornynda 4 jolaýshysy bar avtobýs shuńqyrǵa qulap, eki adam syrtqa shyǵarylǵan bolatyn. Al qalǵan eki adam 90 kúnnen beri áli tabylmaı jatyr. Olardy izdeý jumystary bıyl 23 aqpanda toqtap qalǵan.

Sol tabylmaı jatqan azamattardyń týǵan-týystary Astanaǵa kelip, Prezıdent ákimshiligi, Úkimet pen Bas prokýratýraǵa aryz qaldyrdy. Olar izdeý jumystaryn qaıta bastaýdy talap etedi.

Maıqaıyńda tabylmaı jatqan eki adamnyń biri – Aıdos Shaımerdenniń týǵan qaryndasy Aınash Májıtova “bılikke, halyqqa, memleketke únimiz jetse” deıdi.

– Astanaǵa kelip, búkil ótinim, aryzdarymyzdy Úkimetke, Prezıdent ákimshiligine, Bas prokýratýraǵa qaldyrdyq. Olar bizdiń aryzdy qabyldady. 23 aqpanda qazý jumystaryn toqtatyp tastady. Esterińizde bolsa, áýeli 4-7 aqpan aralyǵynda bir toqtatqan edi. Endi 23 aqpannan beri bir jarym aı ótti. Qazý jumystary sol kúıi qaıta bastalǵan joq. Negizgi sebep – saraptamanyń josparly jobasynyń bolmaýy. 26-27 aqpan kúnderi Pavlodar oblysy ákimdiginiń basshylyǵymen kezdesken kezde uqqanymyz, «Maıqaıyń altyn» kompanıasy men PVAZ (Kásibı áskerı apattyq qutqarý qyzmeti – Aıdos Shaımerdenniń jumys berýshisi) qarjylandyrý men kelisim jasaý jaǵynan ortaq sheshimge kele almaı otyr eken. Demek, jaýapkershilikti bir-birine ıteredi.

Biz osyndaı jaıtqa kýá bolyp, shette, osylaı kelise almaǵan taraptardyń qurbany bolyp qalyp turmyz, – deıdi Aınash.

Tabylmaı jatqan ekinshi adam – júrgizýshi Aıyp Tileýbergenovtyń inisi Amangeldi Tileýbergenov. 

– Týystarymyzdy Alla panasyna aldy ǵoı. Máıitteri áli shyǵarylǵan joq. Arýaǵymyzdy qurmetteıtin qazaqpyz. Biz alyp shyǵyp, arýlap jerleıik degenbiz. Biraq 23 aqpannan beri qazba jumystary toqtap qaldy. Sol máselemen Prezıdent ákimshiligine kelip, ótinish qaldyrdyq. Qazba jumystary qaıtadan qalpyna keltirilse deımiz, – deıdi ol.

Amangeldi Tileýbergenovtyń aıtýynsha, qazir «Maıqaıyń» kombınaty “kinásizbiz” dep, jumys berýshi kompanıany «100 paıyz kináli osylar» dep sotqa berip jatqan kóirnedi. İshinde “júrgizýshi de kináli” dep te jazyp qoıǵanyn aıtady týystary.

– «Artynda kele jatqan kólik toqtady, nelikten avtobýs túsip ketti» dep argýment keltiredi. Biraq ol jerde jaryq ta bolmaǵan ǵoı. Eki kóliktiń ortasy – 20-30 metr. Artta kele jatqan kólik – Kıa Sporteıdj degen jeńil kólik. Ol avtobýstyń qulap jatqanyn kórip, birden toqtaǵan. Avtobýsqa shuńqyr kórinbegen. Ekinshiden, jappaı jarylystardan keıin bular ishinde kisi qalyp qoıdy ma dep jantalasyp bara jatqan. Baıqaýsyzda ózderi qulap ketken.

Bizdiń maqsatymyz – bizdiń ótinish prezıdentke jetse deımiz. Úkimet basshylary qarap, kombınat basshylaryn qandaı ádispen bolsyn qazba jumystaryn qaıta qalpyna keltirgeni kerek! – deıdi ol.

Amangeldi Tileýbergenovtyń aıtýynsha, qaza bolǵan azamattardyń týǵan-týystaryna kómek berilgenimen, tabylmaı jatqan Aıdos Shaımerdenniń balalaryna kómek berilmegen. «Kómek jaǵy qaraýda jatyr» degen jaýap kelgen.

– Komıbınat sozbaqtap júr. Úkimet múshelerimen kezdesdýe sol másele de aıtyldy. Shetel ınvestory baılyǵymyzdy alyp, adamdardy kómip kete bere me? Osyndaı suraq qoıdyq. Úkimetten kelgender “qaraımyz, sheship berýge tyrysamyz” dedi, – deıdi ol.

 

Bul maqala týraly ne oılaısyz?