Tilshi: Pýtın Reseıde ishinara mobılızasıa jarıalady. Bul jaǵdaı Qazaqstanǵa qalaı áser etýi múmkin?
Aıdos Sarym: Kórshińniń úıi órtense, jaqsy emes qoı. Bul da sondaı jaǵdaı. Keshegi Memlekettik dýmanyń qabyldaǵan sheshimi bir kúnniń ishinde Reseıdiń bırjasyn bir trıllıon rúblge álsiretti. Qazaqstan Reseımen birge kedendik odaqqa múshe. Ekinshi másele — mobılızasıa bastalǵan soń, áskerge jaramdy degen azamattar bytyrap qashýy múmkin. Sol kezde shekaradaǵy qaýipsizdikti kúsheıtýge týra keledi. Biraq shekarany jabýǵa negiz joq.
Tilshi: Shekarany jabýǵa esh negiz joq dep esepteısiz be?
Aıdos Sarym: Eger shekaraǵa qarý ustaǵan qaraqshylar, qylmyskerler urlyqqa kelse, onda bul máseleni qarastyrý kerek.
Tilshi: Basqa qandaı qaýip kóresiz?
Aıdos Sarym: Eger Reseıdegi jaǵdaı tym ýshyǵyp ketetin bolsa, onda eldiń ydyraýy degen másele kóterilýi múmkin. Qazaqta "jaý joq deme, jar astynda" degen maqal bar. Shyn máninde esi durys memleket syrtqy elderdiń bergen kepildigine senbeýi kerek. Qazaqstan da eńbektenip jatyr. Mysaly, Qostanaıda jattyǵýlar ótýde.
Tilshi: Qytaı prezıdentiniń Qazaqstanǵa kelýine qatysty ne aıtasyz?
Aıdos Sarym: Bul bizdiń kópvektorly saıasat ustanýymyzǵa paıdaly. Sosyn maǵan Sı Szınpınniń (QHR tóraǵasy- red) Qazaqstan týraly sózi unady. Qazaqstan jaıly álemdik saıasatkerler olaı aıta bermeıdi. Bul Batys elderine de, Reseıge de sıgnal dep oılaımyn. Osy kezeńge deıin elimizdiń Qytaımen qarym-qatynasy bizdi biraz qatelikten saqtap qaldy. Birinshisi — Qyrymdy moıyndaý, ekinshisi — Abhazıa men Osetıa moıyndaý. Óıtkeni bir odaqtamyz bizdi qoldańdar degen kezde Qytaıdyń pozısıasy kómekke keldi.
Tilshi: Keshe Qaırat Satybaldynyń soty bastaldy. Sonda "Qazaqtelekom" men "Kóliktik servıs ortalyǵy" medıasıaǵa kelgenin aıtyp, isti jeńildetýdi surady. Biraq keıibir zańgerler mundaı aıyptaýlardyń medıasıaǵa kelmeıtinin aıtyp jatyr. Buǵan ne deısiz?
Aıdos Sarym: Bul aýyr aıyptaý ǵoı. Zańgerler sodan nan taýyp júr, jaqsyraq bilýi tıis. Al depýtat retinde sot júrip jatqan tusta pikir bildire almaımyn.
Tilshi: Qaırat Satybaldynyń sotynda sýdıa vıdeo men aýdıo jasaýǵa tyıym saldy. Bálkim, osyǵan qatysty zańdy ózgertetin ýaqyt kelgen shyǵar...
Aıdos Sarym: Qazirgi zańda jazylǵany sotqa qatysyp jatqan taraptar biraýyzdan ashyq nemese jabyq ótkenin qalasa, sýdıa solardyń ótinishin qanaǵattandyrady. Kóptegen is bar. Pedofılıa bolýy múmkin. Túsingenim, Satybaldynyń isinde prokýratýra da, Qaırattyń ózi de jáne "Qazaqtelekom" sekildi kompanıalar biraýyzdan qoldaǵan soń, jabyq ótkizýge sheshim qabyldandy. Sizderge sottyń aıaqtalǵanyn kútý kerek. Keıin ár taraptyń avdokatyn ustap, pikirlerin alarsyzdar.
