Túlkibas aýdanynda qaıǵyly jaǵdaı oryn aldy. 29 jastaǵy Chernyh otbasynyń kelini aýyl ishindegi eski qubyrdan tabylǵan. Bul týraly Túrkistan oblysynyń polısıa departamentiniń baspasóz qyzmeti jarıalady.
“18 naýryz kúni tańerteń nemeremnen kelinniń úıde joq ekenin estidim. Jan-jaqtan izdedik. Keıin aýyl turǵyndary qubyrdan tabylǵanyn jetkizdi. Dereý sol jerge jettik. Qudaǵıym men qutqarýshylar “kómektersińder” degen daýysty estigendeı boldyq deıdi. Biraq astynan alyp shyqqanda jansyz boldy. Meniń kelinim ózine qol salǵanyna senbeımin. Ólgisi kelse, adam azapty emes, ońaı amaldaryn da taba alady ǵoı?! Onymen birge aýyldaǵy bir er adam barypty. Ol mas. Surasam “ózi ólgisi kelip, ishine túsip ketti” deıdi. Onyń ishine túsip kete salý ońaı emes”, – deıdi marqumnyń enesi Svetlana Chernyh.
Saýsaqtary synyp, shashynyń julynǵany jáne denesiniń kók ala qoıdaı kógergeni anyqtaldy.
“İsti tergep-teksermeı mundaı baılamǵa qalaı kelgen? Ne bizden, ne oqıǵany habarlaǵan kýágerden jaýap alǵan joq. Biz, Rımanyń ózine qol salǵanyna senbeımiz. Adam ólý úshin sonsha jer kezip bara ma? Úıde urys-janjal da bolǵan joq. Úsh balasy bar. Bárine tıanaqty qarap júrdi. Ata-analar komıtetiniń tóraıymy. Osyndaı adam ózin óltirý úshin aıdaladaǵy qubyrǵa túse me?”, – deıdi Svetlana Chernyh.
“Ol qubyrdyń baryn bul aýylda ekiniń biri bilmeıdi. Áıelim bildi degenge de senbeımin. Jazyq dalada jatqan qubyrda kimniń qandaı sharýasy bolýy múmkin? Al, kýáger metal jınap ótkizetin. Ol qubyrdy birer kún buryn kesip alyp ketkisi kelgen kórinedi. Ózi qulady deıdi. Birge barsa nege qutqarmaǵan? Bul iste shıkilik kóp”, – deıdi marqumnyń kúıeýi.
Jalańaıaq, ishindegi kıimder jyrtyq kúıinde qubyrdan shyǵarylǵan.
“Sol túni ǵana men jumystan kelgen soń, saıahattap Tashkente baramyz dep keliskenbiz. Suraǵannyń bárin alyp beretinmin. Tarshylyq kórgen joq. Túsinbeımin. Áıelim jumbaq jaǵdaıda óldi. Polısıa bolsa “Ózine qol saldy” deıdi. Quzyrly organ ókilderi isti jyly jappaı, tergeý júrgizý kerek!”, – deıdi Mıhaıl Chernyh.
Chernyh otbasy qylmystyq istiń maı-shammen tergelgenin qalaıdy. Alaıda quqyq qorǵaýshylar qaraly kúnnen beri qımylsyz eken. Tek áleýmettik jelide jazba jarıalap, shaǵym aıtqan soń ǵana jaýap alýǵa shaqyrypty.
"Qazirgi ýaqytta polısıa "Ózin-ózi óltirýge deıin jetkizý" baby boıynsha tergeý júrgizýde. Zańdy prosesýaldyq sheshim qabyldanatyn bolady. Oqıǵanyń barlyq mán-jaıy anyqtalyp jatyr", – deıdi Túrkistan oblystyq polısıa departamentiniń baspasóz qyzmeti.
Rıma Chernyhtyń artynda úsh balasy qaldy. Úlkeni toǵyzda bolsa, kishisi nebári tórt jasta.
