Tiri bolsam, qazaqqa qyzmet etpeı qoımaımyn!

Álıhan Bókeıhan

Qyrǵyz ben tájik arasy shıelenisip ketti

17 qyrkúıek 2022 66
Qyrǵyzstan men Tájikstan shekarasynyń daýly aýdandaryndaǵy qaqtyǵys kezinde ondaǵan adam qaza boldy. Aqparatqa qaraǵanda, tájik aýylyna shabýylda áskerı dron paıdalanylǵan. Qyrǵyz jaǵy tájik áskeriniń tank, mınomet jáne ózge de aýyr qarý túrlerin paıdalanǵanyn málimdedi.

Adam shyǵyny týraly málimet Qyrǵyzstan men Tájikstan basshylarynyń atysty toqtatý týraly kelisiminen keıin de túsip jatty.

Qyrǵyzstan densaýlyq saqtaý mınıstrliginiń málimetinshe, qaqtyǵys nátıjesinde 24 adam qaza bolǵan, 87 adam jaralanǵan. 17 qyrkúıekte tańerteń jaralanǵandardyń beseýi bala ekeni habarlandy. Olar Bishkekke emdeýge jiberilgen.

Qyrǵyzstan ulttyq qaýipsizdik jónindegi memlekettik komıtetiniń (UQMK) basshysy Qamshybek Tashıev atys toqtaǵanmen jaǵdaı ýshyqqan kúıi qalǵanyn málimdedi. Onyń sózine qaraǵanda, qaza bolǵandardyń basym bóligi – áskerı qyzmetkerler.

Tájik jaǵy Bobodjon Gafýrov aýdanyna qarasty Ovchıkalacha aýylyndaǵy meshitke soqqy jasalǵanyn habarlady. Azattyqtyń Tájik qyzmetine oqıǵa ornynan túsirilgen vıdeo jetken.

Ovchıkalacha turǵyny Ahror Nematov Ozodı radıosyna ondaǵan adam qaza bolǵanyn jáne jaralanǵanyn aıtty. Jergilikti sheneýnik meshitke soqqy jasalǵanyn da rastady. Ol bılik jergilikti halyqty evakýasıalap jatqanyn aıtty.

"Azıa-Plús" aqparat agenttigi Telegram arnasynda qyrǵyz dronynyń shabýyly saldarynan adamdar jaralanǵanyn jazdy.

"Atysty toqtatý týraly habardan keıin jurt kóshege shyqty, osy ýaqytta dronmen halyqqa soqqy jasaldy" dedi turǵyndar.

Ozodı radıosyna jiberilgen vıdeoda jerde alty máıittiń jatqany kórinedi. Soǵdy oblysynda júrgen jýrnalıs vıdeonyń Ovchıkalacha aýylynda túsirilgenin rastady.

Tájikstan bıligi qyrǵyz jaǵyn "jaǵdaıdy qaıta ýshyqtyrdy" jáne "beıbit turǵyndarǵa dronmen soqqy jasady" dep aıyptady.

Eki derekkózdiń habarlaýynsha, 16 qyrkúıekte keshke drondar Hodja Alo aýdanynda da paıdalanylǵan.

Qyrǵyz bıligi aıyptaýlarǵa túsinikteme bermedi.

Qyrǵyzstan prezıdentiniń baspasóz hatshysy Erbol Sultanbaevtyń aıtýynsha, prezıdent Sadyr Japarov pen tájik áriptesi Emomalı Rahmon Shanhaı yntymaqtastyq uıymy samıtinde jaǵdaıdy talqylaǵan. Basshylar atysty toqtatý týraly kelisim jasasyp, shekaraǵa delımıtasıa jáne demarkasıa jasaý jónindegi ortaq komısıa jumysyn jalǵastyrý týraly kelisken.

Keıin Japarov Bishkekke ushyp kelip, Qaýipsizdik keńesiniń kezekten tys otyrysyn ótkizdi.

Qyrǵyzstan shekara qyzmeti atysty toqtatý týraly kelisimge qaramastan qaqtyǵys jalǵasyp jatqanyn habarlady.

"Tájik jaǵy kelisimdi buzyp, Leılek aýdanyndaǵy Kýlýndý jáne Jany-Jer eldi mekenderindegi qyrǵyz shekarashylarynyń beketterin atqylady" dedi shekara qyzmetiniń ókilderi. Olardyń aıtýynsha, tájik jaǵy Batken oblysynda dúrkindetip atatyn zymyran júıesin qoldanǵan.

Qyrǵyzstan shekara qyzmeti tájik jaǵyn tank, brondy tehnıka jáne mınomet qoldandy dep aıyptady. Bishkektiń habarlaýynsha, 16 qyrkúıekte tańerteń tájik jaǵy Batken qalasy mańyndaǵy eldi mekenderdi atqylaǵan. Azamattyq ınfraqurylymdarǵa snarádtar túsken.

Ortalyq Azıadaǵy shekara máseleleriniń edáýir bóligi sovet kezeńimen baılanysty. Ol kezde Sovet ókimeti "ekonomıkalyq múdde úshin" dep bir respýblıka jerin ekinshisine ońdy-soldy tabystaı bergen. 16 qyrkúıekte Máskeý taraptardy atysty toqtatýǵa úndedi.
Bul maqala týraly ne oılaısyz?