Táýelsizdiktiń 33 jyly bıyl. Al Shyǵys Qazaqstan oblysynyń Rıdder qalasyndaǵy 16 mekteptiń bireýi – jalǵyz qazaq mektebi, eski «Shańyraq» mektebiniń qurylysy áli bastalmapty. Bul týraly Alash.kz saıty Azattyq Ruhyna siltep habarlaıdy.
Bilim ordasynyń oqýshylary 2023-2024 oqý jylynyń 1 qyrkúıeginen bastap «№11 jalpy orta bilim beretin mekteptiń» ǵımaratynda oqyǵan. «Shańyraq» kópsalaly mektep-gımnazıasynda 0-den 11- synypqa deıin oqıtyn 488 oqýshy bar. Olardyń bári bir aýysymda oqıdy.
«Qazirgi ýaqytta qurylys úshin jer ýchaskesi resimdelip, jobalyq-smetalyq qujattama ázirlenip jatyr. Osy rásimder aıaqtalǵannan keıin Qurylys - montajdaý jumystarynyń merdigeri aıqyndalady», - dep jaýap berdi Rıdder qalasynyń bilim bóliminen.
Qurylys jumystary 2024 jyldyń 4 toqsanynda bastalmaq. Tapsyrys berýshi – «Qazmyrysh» JSHS.
Eske salsaq, 2023 jyly mektep oqýshylarynyń ata-analary bilim oshaǵynyń apatty jaǵdaıda turǵanyn aıtyp, daý kótergen. Sodan keıin qala ákimdigi «Shańyraq» mektebine jóndeý jumystarynyń qajettigine baılanysty oqýshylardyń basqa ǵımaratqa ýaqytsha kóshirilgenin habarlaǵan.
Buǵan deıin jazǵanymyzdaı, Shyǵys Qazaqstan oblysynyń iri qalalarynyń biri Óskemende 12 qazaq, 16 orys mektebi bolsa, Rıdder qalasynda 12 orys 1 ǵana qazaq mektebi bar.
