KTK arnasy 28 mamyr kúni Bıshimbaevtyń qorǵaýshylary qalaı qarsylyq tanytyp jatuanyn baıandady. Aqparatqa sáıkes, úsh advokattyń ishinde alǵash shaǵym túsirgen Erlan Ǵazymjanov bolǵan. Ol úkimniń "Kisi óltirý" babyna qatysty tusyn "Abaısyzda adam ólimine ákep soqqan densaýlyqqa aýyr zıan keltirý" babyna aýystyrýdy surap otyr. Al úkimniń "Qorlaý" babyna qatysty bóligin múlde alyp tastaý kerek degen pikirdi ustanady.
"Erteń eki áriptesim men Bıshimbaevtyń ózi de ızolátordan apelásıalyq shaǵymyn jiberedi" - deıdi advokat.
29 mamyr kúni tergeý ızolátorynan Bıshimbaevtyń ózi apelásıalyq shaǵym jiberedi dep josparlanyp otyrǵany da málim boldy.
"Apelásıalyq shaǵymda sot talqysy kezinde sýdıa jol bergen 20-ǵa jýyq prosesýaldyq zań buzýshylyqty kórsettik. Bul, bizdiń oıymyzsha, alqabıler sheshimi men úkimniń zańsyzdyǵyna sebep boldy. Búgin tergeý ızolátorynda boldym, qorǵaýymdaǵy azamat Qýandyq Bıshimbaevqa ótinish mátinin kórsettim, ol kelisip otyr. Erteń ol da óz shaǵymyn jibermek" - dedi Erlan Ǵazymjanov.
Eske salsaq, burynǵy ulttyq ekonomıka mınıstri Qýandyq Bıshimbaev jubaıy Saltanat Núkenovany asqan qatygezdikpen óltirgeni úshin kináli dep tanyldy. Ol 24 jylǵa bas bostandyǵynan aıyryldy. Bıshimbaevpen birge aýyz jalasyp, qandy qylmysty jasyrǵany úshin inisi Baqytjan Baıjanov 4 jylǵa sottaldy. Ol da kúni keshe úkimmen kelispeı, apelásıalyq shaǵym túsirgen edi.
