Tiri bolsam, qazaqqa qyzmet etpeı qoımaımyn!

Álıhan Bókeıhan

Qyrǵyzstanda "tobyrlyq tanymǵa uryndyratyn" TikTok tusaýlanady, Reseı de buǵattaýǵa bas qatyryp jatyr

17 sáýir 2024 405

Qyrǵyzstan tarapy TikTok áleýmettik jelisine kirýdi shekteýge daıyn ekendin habarlady, al Reseıde TikTok platformasyn buǵattaý máselesi qarastyrylyp jatyr, dep habarlaıdy Alash.KZ ulttyq portaly. 

Qyrǵyzstandaǵy TikTok segmentine qatysty syn aıtyldy. Buǵan deıin de Alataýdyń arǵy jaǵyndaǵy aǵaıyn TikTok-ta balalardyń aqparat keńistigine tán mazmundy ónim men saýatty ustanym joq ekenin málimdegen. 

Sheneýnikter "balalardyń densaýlyǵyna, olardyń fızıkalyq, rýhanı, adamgershilik damýyna zıan keltirýdiń aldyn alý sharalary týraly" zańǵa silteme jasaı otyryp eldegi áleýmettik jeliniń jumysyn shekteýge qatysty sheshim qabyldady.

Baılanys operatorlaryna 18 sáýirge deıin sharalar qabyldaý qajettigi týraly hat joldandy.

Reseıde de TikTok jelisi buǵattalýy múmkin. Mundaı bastamamen áleýmettik jeliler men messendjerlerdiń kásibı paıdalanýshylar qaýymdastyǵynyń ókilderi Roskomnadzorǵa júgingen. 

Reseılik sarapshylardyń aıtýynsha, Tik Tok-ty buǵattaý otandyq áleýmettik jeliler jumysyn jandandyrady, nátıjesinde aýdıtorıa 30 mıllıon adamǵa artady.

Qazir Roskomnadzordyń ótinishti qabyldaǵany jáne ony 8 mamyrǵa deıin talqyǵa salatyny aıtyldy.

Esterińizge sala keteıik, qazaqstandyq depýtattar TikTok áleýmettik jelisiniń jumysyn shekteý týraly birneshe ret aıtqan bolatyn. Atap aıtqanda, senator Álisher Satvaldıev kámeletke tolmaǵan paıdalanýshylarǵa shekteýler qoıýdy usyndy. Onyń pikirinshe, 18 jasqa deıingi balalar bul platformada kúnine bir saǵattan artyq ýaqyt ótkize almaıdy.

Sáýir aıynda qazaq tilin kústanalaǵan almatylyq 21 jastaǵy tıktoker eki jylǵa sottaldy.

 

Bul maqala týraly ne oılaısyz?