Qazaqstannyń Ýkraınadaǵy jáne Moldova respýblıkasyndaǵy tótenshe jáne ókiletti elshisi Darhan Qaletaev shuǵyl málimdeme jasady.
Ol Informbúro baǵdarlamasyna bergen suhbatynda, eldegi jaǵdaı turaqyt ekenin aıtty. Alaıda, soǵys boljanǵandyqtan, eldegi ekonomıka quldyraı bastaǵan.
«Ýkraınada bolyp jatqan jaǵdaıdy ózderińiz kórip, bilip otyrsyzdar. Bul máseleler Ýkraına ekonomıkasyna óte kúrdeli ózgerister engizip jatyr. Búgingi tańda, árıne, halyqtyń kóńil-kúıi túsip ketken. Bireý úıińe esigińdi teýip kirip jatsa, qandaı sezimde bolar ediń» dedi Darhan Qaletaev.
Onyń aıtýynsha, Kıevte qazir tynysh. Elshi «Soǵys bolyp jatyr» degen bos sóz dep sendirdi. Ýkraınada qazir eki myń qazaqstandyq tirkeýde tur.
«Olardyń bárimen tikeleı habardamyz. Qaýip tóngen jaǵdaıda qalaı jumys isteýimiz kerek ekeni jóninde josparymyz bar. Qazaqstannyń Syrtqy ister mınıstrligimen bul másele kelisilgen. Árıne, eń bastysy – áýe joly. Qazir ǵana Air Astana áýe kompanıasynyń basshylyǵymen tikeleı telefon arqyly kelissóz júrgizdim. Qalaı jumys isteýimiz kerek ekeni jóninde tolyq túsinik bar. Eger áýe joly jabylsa, basqa da joldar bar» dedi Qaletaev.
Eske salsaq, buǵan deıin Ýkraınanyń syrtqy ister mınıstri Reseıdiń burynǵy Keńes Odaǵyn qurýǵa tyrysyp jatqanyn málimdegen.
Derekkóz
