Qazaqstanda avtokólik jáne aýyl sharýashylyǵy tehnıkasyna ýtılızasıa alymynyń mólsheri 50 paıyzǵa azaıady. Bul jóninde 23 aqpan kúni memleketik "Habar 24" telearnasyna bergen suhbatynda premer-mınıstrdiń orynbasary Roman Sklár habarlady.
Onyń aıtýynsha, avtokóliktiń barlyq túri men aýyl sharýashylyǵy tehnıkasyna ýtılızasıa alymyn 50 paıyzǵa azaıtý týraly sheshim qabyldanǵan.
Qazir elde mundaı alym mólsheri kólik kólemine qaraı 437 myń teńgeden bastalyp, 5,9 mıllıon teńgege deıin barady.
Buǵan deıin oǵan qarsy azamattar damyǵan elderde ýtılızasıa alymy 100 myń teńgeden aspaıtynyn, al keı memlekette kólikti ýtılızasıadan ótkizetin zaýyttar ózin-ózi qamtamasyz etetinin aıtqan.
Qańtar oqıǵasynan keıin prezıdent Qasym-Jomart Toqaev ýtılızasıa alymyn jınaýmen jeke kompanıa emes, memlekettik organ aınalysýy kerek dep málimdep, eks-prezıdenttiń kishi qyzy Álıa Nazarbaevamen baılanysty "Operator ROP" kompanıasyn jabýdy tapsyrǵan. Artynsha onyń fýnksıasy "Jasyl damý" aksıonerlik qoǵamyna júktelip, aqpan aıynyń basynda ýtılızasıa alymyn qabyldaı bastaǵan.
23 aqpan kúngi suhbatynda Roman Sklár úkimet jańa operatordyń esepshotyndaǵy 200 mlrd teńge qarajattyń 130 mlrd teńgesin kólik nesıesiniń sharttaryn jeńildetý men avtobýstar satyp alýǵa jumsaý týraly sheshim qabyldaǵanyn habarlady.
– "Jasyl damýdyń" esepshotynda qalǵan qarajat halyq ıgiligine jumsalýy tıis. Muny qalaı júzege asyramyz? 100 mlrd teńge otandyq kólikterdi jeńil sharttarmen nesıege berýge jumsalady. Jyldyq syıaqy mólsheri – 4 paıyz, alǵashqy jarnasy nól teńgemen jeti jylǵa beriledi" dedi Sklár.
Onyń aıtýynsha, naqty jaǵdaıda 71 myń azamat asa qymbat emes jańa kólikterdi satyp ala alady. Al 30 mlrd teńge avtobýs parkterin jańalaýǵa jumsalady.
Elde byltyrdan beri ýtılızasıa alymyn azaıtýdy nemese múlde alyp tastaýdy talap etken júrgizýshiler narazylyǵy kóbeıgen shaqta ındýstrıa jáne ınfraqurylymdyq damý mınıstrligi qańtarda ýtılızasıa alymyn jańa ádis boıynsha esepteıtinin habarlaǵan.
