Tiri bolsam, qazaqqa qyzmet etpeı qoımaımyn!

Álıhan Bókeıhan

Qazaqstanǵa kómek kórsetken Qyrǵyzstannyń úsh oblysynda tótenshe jaǵdaı jarıalandy

24 sáýir 2024 151

Qyrǵyzstannyń Osh oblysynda tótenshe jaǵdaı jarıalandy. Sel saldarynan bir otbasynyń qaza tapqany aıtyldy, dep habarlaıdy Alash.KZ ulttyq portaly.

Qyrǵyzstannyń úsh oblysynda tótenshe jaǵdaı rejımi engizildi. Bul týraly brıfıńte TJM basshysynyń orynbasary Ýrmatbek Shamyrqanov málimdedi. Onyń aıtýynsha, TJM basshysy Bolotbek Erkeev qutqarýshylarmen birge qazirgi ýaqytta eldiń ońtústiginde júr.

Qyrǵyzstannyń birneshe aımaǵynda sel júrip jatyr. TJM málimetteri boıynsha, úsh kún ishinde Qyrǵyzstanda 40-tan astam sel aǵyny tirkelgen. 20 sáýirden bastap úzdiksiz jańbyr jaýyp,Osh, Batken, Jalal-Abad jáne Talas oblystaryndaǵy ondaǵan eldi-mekenderge zardabyn tıgizgen. Osh oblysynda 171 alqap,Jalal-Abad oblysynda-122, Talas oblysynda - 202 turǵyn úı jáne aýla sý astynda qalǵan.

Al bir aýylda selge qarsy bógetti sý buzyp ketken. «Kýrsıv» portalynyń habarlaýynsha, eldegi tas joldardyń birinde kólikpen kele jatqan bir otbasy qaza tapqan.

Jergilikti sınoptıkter apta boıy jańbyr jaýatynyn habarlandy. 

Esterińizde bolsa, biz Qyrǵyzstannyń Tótenshe jaǵdaılar mınıstrligi sý tasqynynan zardap shekken qazaqstandyqtarǵa kómek retinde «Járdem kerýeni» atty gýmanıtarlyq júktiń ekinshi partıasyn jóneltkenin jazǵanbyz.

Ekinshi gýmanıtarlyq júk Qyrǵyzstanda óndirilgen sút ónimderinen quralǵan edi. Atap aıtqanda,10 myń lıtr aıran, 14,2 myń qorap qaımaq, 10 myń lıtr sary maı men ósimdik maıy, 20 tonna goland irimshigi, 80 tonna maısyzdandyrylǵan qurǵaq sút.

«Júk qyrǵyz halqynyń kúshimen jınaldy, Prezıdenttiń rezervtik qorynan qosymsha qarajat bólindi» dep habarlady Tótenshe jaǵdaılar mınıstrligi.

Munymen qosa, sáýir aıynyń basynda Jambyl oblysyna Qyrǵyzstannan alǵashqy gýmanıtarlyq júk – 300 tonna júk tıegen 15 júk kóligi keldi. Júk Qazaqstannyń tórt oblysyna bólindi.

Dastan Qastaı

 

Bul maqala týraly ne oılaısyz?