2022 jyldyń 1 qańtary men 1 aqpany aralyǵynda Qazaqstanǵa ózge elderden 1820 qazaq oralyp, qandas mártebesin alǵan. Bul jóninde Eńbek jáne halyqty áleýmettik qorǵaý mınıstrliginiń 17 aqpan kúngi habarlamasynda aıtylady. 1991 jyldan beri shette júrgen 1 mıllıon 89,7 myń qazaq tarıhı otanyna oralǵan.
Jyl basynda kelgen qandastardyń kóbi Ózbekstannan (73,5%) kelgen. 11,8% – Qytaıdan, 3,7% – Túrkimenstannan, 3,1% –Mońǵolıadan jáne 8,1% basqa elderden kelgen.
Olar negizinen Almaty, Mańǵystaý, Túrkistan jáne Jambyl oblystaryna, sonymen birge Almaty, Nur-Sultan jáne Shymkent qalalaryna qonystanǵan.
Aqparatqa qaraǵanda, bıyl kelgenderdiń 60 paıyzǵa jýyǵy – eńbekke jaramdy, 24,3%-y – eńbekke qabiletti jastan kishi , 15,8 paıyzyn zeınetkerler quraıdy.
Eńbekke qabiletti qandastardyń 12%-ynyń joǵary bilimi bar. 39,8 paıyzynyń orta kásibı bilimi bar. 47,1%-y - orta bilimdi. Shamamen 1,1%-ynyń bilimi joq.
Elde qandas mártebesi bir jylǵa deıin jaramdy. 2020 jyly mamyrda kóshi-qon máseleleri boıynsha keıbir zań aktilerine ózgerister men tolyqtyrýlar engizilip, buǵan deıin "oralman" atalyp kelgen etnıkalyq qazaqtar "qandas" dep atalatyn bolǵan. Biraq oralmandar bul ózgerister azamattyq alý prosedýrasyn jeńildetpedi dep sanaıdy.
