Túrkıa prezıdenti Rejep Taıyp Erdoǵan Ankarada Qazaqstan prezıdenti Qasym-Jomart Toqaevpen kezdeskennen keıin málimdeme jasady.
Bul týraly Tengrinews.kz habarlaıdy.
Erdoǵan Toqaevty baýyrym dep atap, Qazaqstandy túrikterdiń tarıhı otany, al Túrkıany qazaqtardyń ekinshi otany sanaıtynyn aıtty.
– Bıyl Qazaqstan men Túrkıa dıplomatıalyq qarym-qatynasqa 30 jyl tolyp otyr. Jańa ǵana qol qoıǵan ortaq deklarasıa arqyly biz áriptestik qarym-qatynasymyzdy strategıalyq seriktestiktiń jańa deńgeıine kóterdik. Túrkıa men Qazaqstan eki baýyrlas el. Biz Túrkıa Qazaqstandaǵy turaqtylyq pen tynyshtyqqa úlken kóńil bólemiz, – dedi Erdoǵan.
Túrkıa basshysy bıylǵy qańtarda Qazaqstanda bolǵan qaıǵyly oqıǵaǵa baılanysty kóńil aıtyp, jaralylardyń tezirek saýyǵyp ketýin tiledi. Onyń aıtýynsha, qıyndyqtar Qazaqstandy tek nyǵaıtty.
– Asa qurmetti Toqaevtyń jańa Qazaqstannyń qalyptasýyndaǵy ynta-jigeri men tabandylyǵy maqtaýǵa turarlyq. Osy sheńberde júrgizilip jatqan aýqymdy reformalar men baǵdarlamalardy qoldaıtynymdy bildiremin. Qazaq baýyrlastarymyzdyń turaqtylyǵy, tynyshtyǵy jáne qaýipsizdigi úshin biz jaýapkershiligimizdegi nárselerdi jasaýǵa daıyn ekenimizdi taǵy bir ret atap kórsetemin. Ári saıası, ári saýda jaǵynan, áskerı, ekonomıkalyq, mádenı jaǵynan barlyq salada osy uıymshyldyǵymyzdy jalǵastyryp, bolashaqqa ıyqtasyp myqty qadam basamyz dep oılaımyn., – dedi Erdoǵan.
Túrkıa prezıdenti eki el arasyndaǵy ózara taýar aınalymynyń 5 mıllıard dollardan asqanyn jáne jańa maqsattyń taýar aınalymyn 10 mıllıard dollarǵa jetkizý ekenin túsindirdi.
– Erteń túrik bıznesmenderimen ótkizetin kezdesýimiz osy turǵyda paıdaly bolady dep úmittenemin. Biz túrik kompanıalaryn Qazaqstanǵa ınvestısıa salýǵa yntalandyrýdy jalǵastyrýdamyz. Kezdesýlerimizde kólik, qorǵanys ónerkásibi, bilim jáne mádenıet, energetıka jáne basqa salalardaǵy ózara ınvestısıa týraly pikir almasyp kelistik, – dep sendirdi Erdoǵan.
Shaǵyn quramda prezıdentter Ýkraınadaǵy jaǵdaıdy talqylady.
– Ýkraınanyń egemendigi men aýmaqtyq tutastyǵyna negizdelgen daǵdarysty beıbit jolmen sheshýge qatysty bizdiń kózqarastarymyz sáıkes keledi. Siz sondaı-aq Ýkraınadaǵy soǵysty toqtatý úshin basynan beri tyǵyz jumys istep kele jatqanymyzdy bilesiz. Árıne, bul soǵys taǵy bir márte Túrki memleketteriniń ekijaqty deńgeıde jáne túrki memleketteriniń shańyraǵy astynda yntymaqtastyǵy men yntymaqtastyǵy mańyzdylyǵyn atap ótti. Biz qurmetti baýyrym Toqaevpen BUU, IYU jáne ekonomıkalyq yntymaqtastyq uıymy sekildi halyqaralyq platformalarda uıymshyldyǵymyzdy jalǵastyratynymyzǵa kelistik.
Atamekenimiz Qazaqstannan bizdiń elimizge kelip otyrǵan prezıdent, asa mártebeli Toqaev jáne onyń qurmetti delegasıasyn óz jeke atymnan jáne delegasıamnyń atynan taǵy da alǵys bildiremin, – dedi Erdoǵan.
Prezıdent Toqaev Erdoǵanǵa Túrkıaǵa shaqyrý jáne qonaqjaılylyq úshin alǵysyn bildirdi.
– Búgin biz eń mańyzdy máseleler boıynsha jan-jaqty kelissózder júrgizdik. Prezıdent Rejep Taıyp Erdoǵan dana ári qurmetti saıasatker, sondyqtan onyń pikiri óte mańyzdy. Túrkıa – bizdiń táýelsizdigimizdi alǵashqy bolyp moıyndaǵan el. Ony qazaq halqy eshqashan umytpaıdy. Qazaqstan –Túrkıadan eshqashan da, eshqandaı da zıan shekpegen el. Áli de solaı jalǵasyp keledi. Qazaqstan men Túrkıa – tamyrlas, baýyrlas, dostas memleketter, – dedi Qazaqstan prezıdenti.
Qasym-Jomart Toqaev qazaq qonystanýshylarynyń túrik jerinen pana tapqanyna bıyl 70 jyl tolǵanyn eske saldy. Olarǵa sol kezde Túrkıanyń premer-mınıstri bolǵan Adnan Menderes kóp kómektesti. Memleket basshysy jýyrda Almatydaǵy kóshelerdiń birine osy kórnekti saıasatkerdiń esimi berilgenin atap ótti.
Erdoǵan osy jyldyń qazan aıynda Qazaqstanǵa keledi jáne Qazaqstan men Túrkıa arasyndaǵy tórtinshi Joǵary deńgeıdegi strategıalyq yntymaqtastyq keńesiniń otyrysyna qatysady dep kútilýde.
Derekkóz
