Sybaılas jemqorlyqqa qarsy is-qımyl agenttigi bilim salasyndaǵy urlyqty quryqtady. Resmı ókil Danıar Begaıdarov 15 aıda 14 mlrd teńgeden astam shyǵyn keltirgen sybaılas jemqorlyq derekteri týraly málimdedi, dep habarlaıdy Alash.KZ ulttyq portaly.
Begaıdarov bilim berý salasynda 2023 jyldan bastap bıylǵy jyldyń birinshi toqsanyna deıin eńbekaqy tóleý qorynan qarajat urlanǵanyn aıtyp,qylmystyq is-áreketter áshkere bolǵanyn atady.
"Býhgalterler ulttyq bilim berý bazasy, mekteptiń býhgalterlik esep júıeleri jáne klıentterdiń qazynashylyq júıesi arasyndaǵy ıntegrasıanyń joqtyǵyn paıdalandy. Olar tólem qujattaryna qolmen túzetýler engizip, búdjet aqshasyn urlady. Jymqyrýshylyq jyl saıynǵy búdjettik ótinimderdi qalyptastyrý kezinde de iske asqan", - dedi spıker.
Danıar Bıgaıdarovtyń aıtýynsha, ustazdar belgilengen normadan joǵary jalaqy alyp júrgen. Bógde tulǵalardyń derektemeleri boıynsha ózderiniń shottaryna bógde adamdardyń jalaqylaryn qosa eseptegen. Sonymen qatar, "qaıtys bolǵan" adamdarǵa jalaqy eseptegen.
"Agenttik bilim berý salasynda osyndaı 206 qylmystyq isti tirkedi. Olar boıynsha zalal 14 mlrd teńgeden asty. Jalpy, urlyqtyń eń úlken somasy Túrkistan, Jetisý, Qyzylorda, Almaty, Aqtóbe oblystary men Almaty qalasynda anyqtaldy. Urlaý faktileri tekserilýde. Mysaly, jaqynda ǵana Jetisý oblysyndaǵy sybaılas jemqorlyqqa qarsy qyzmet Sarqan aýdanynyń búdjettik bilim bólimi basshysynyń zańsyz qyzmetin toqtatty. Ol osy bólimniń býhgalterleriniń shottaryna artyq belgilengen jalaqyny zańsyz aýdarý arqyly 1 mlrd teńge somasynda asa iri mólsherde búdjet qarajatyn urlady dep kúdiktelýde", - dep tolyqtyrdy ol.
Antıkordyń málimetinshe, tergeý áreketteri kezinde 156 mln teńge somasynda aqshalaı qarajat tabylyp, tárkilendi. Kúdikke ilinen azamatt sottyń sanksıasymen qamaýǵa alyndy. Qazir atalmysh is boıynsha tergeý jalǵasyp jatyr.
