QR Parlamenti Májilisiniń depýtaty Erlan Saırov pen qoǵam belsendisi Muhtar Taıjan suhbat berip referendým, qańtar oqıǵasy, Assambleıa týraly pikir bildirdi.
Muhtar Taıjannyń pikirinshe, referendým arqyly Konstıtýsıaǵa ózgerister engizýge bolady. Ata zańǵa qandaı ózgerister engiziletinin aıtqan qoǵam belsendisi referendým qajet dep esepteıdi.
– Referendým demokratıalyq Konstıtýsıaǵa 100 paıyz aparatyn ózgerister emes. Biraq júz paıyz bolmasa da, 50 paıyz bar dep esepteımin. Sol úshin referendým qajet. Bul referendým «Elbasy» statýsyn alyp tastaıdy. Sosyn parlamentte tek partıalardyń tizimimen depýtat bolmaıdy, majorıtarlyq túrde júredi. Konstıtýsıalyq sottyń sheshimi prezıdent úshin, Úkimet úshin, Májilis úshin mindetti bolady. Bizge mundaı ózgerister qajet.
Májilis depýtaty Erlan Saırov ta referendým týraly pikir bildirip, Ata zańǵa engiziletin ózgerister týraly aıtyp berdi.
– Bul Konstıtýsıa bizdiń elimizde defamılızasıa úderisin alyp keledi. Elimizdegi belgili bir januıalardyń, toptardyń saıasattaǵy orny men róli joǵalady. Ekinshiden, rýhanı másele. Konstıtýsıada elimizdiń birligi máseleleri aıqyndalady. Konstıtýsıanyń klasıkalyq úlgisi bar. Rýhanıat, saıasat, elimizdiń saıası júıesi týraly baptar bolý kerek. Mine, sol baptarǵa qaıtyp keledi. Eń negizgisi, 30 jyldyń ishinde olıgopolıa boldy. Konstıtýsıanyń altynshy babyndaǵy «Qazaqstan Respýblıkasynyń jer jáne jer resýrstary Qazaqstan Respýblıkasynyń menshiginde» degen bap bizdiń elimizde úlken ekonomıkalyq jańa qatynastarǵa alyp keledi, – dedi depýtat Erlan Saırov.
Sondaı-aq, depýtat qańtar oqıǵasy reformalardy boldyrmaý úshin jasalǵan áreket ekenin jetkizdi.
– Qańtar oqıǵalary osy reformalardy boldyrmaý úshin istelgen qadam. Bul reformalardyń barlyǵy qańtardan 4-5aı buryn daıyndalyp qoıǵan. Qańtar oqıǵasy prezıdentimizdi aıaǵynan taıǵyzý úshin jasalǵan kúshterdiń qadamy bolǵan. Siz ben biz aıtyp otyrǵan reformalar qańtarda bastalý kerek bolatyn, – dedi ol.
Al qoǵam belsendisi Muhtar Taıjan qańtar oqıǵasy halyqtyń shynaıy narazylyǵyn bildirgenin aıtyp, uıymdastyrǵandardy atady.
– Qańtar oqıǵasy halyqtyń shynaıy narazylyǵyn bildirdi. Biraq oqıǵanyń aıaǵyn klandar paıdalandy. Almatynyń ózinde mıtıń beıbit túrde boldy, sosyn ǵana qarý paıdalanyldy. Qańtar oqıǵasyn Nazarbaevtyń klandary uıymdastyrdy. Óıtkeni, Kárim Másimovtiń ózi mundaı qadamǵa barmas edi, ıaǵnı qoldaý boldy, – dedi Muhtar Taıjan.
Derekkóz
