Atyraý, Aqtóbe, Aqmola, Qostanaı, Soltústik Qazaqstan oblystarynda sý tasqynyna qatysty jaǵdaı kúrdeli. Myńdaǵan adam baspanasy men mal-múlkinen áp sátte aırylyp qaldy. Adam shyǵyny da joq emes.
1981-1995 jyldary Qazaqstannyń sý sharýashylyǵyn basqarǵan Narıman Qypshaqbaev eldegi osy tótenshe jaǵdaıǵa pikir bildirdi, - dep habarlaıdy alash.kz caıty Dalanews.kz-ke siltep.
Sý salasynda uzaq jylǵy tájirıbesi bar maman dál osy tabıǵı resýrs memlekettiń basty kúshi ekenin aıtady.
"El bolamyn deseń jeriń men sýyńa ıe bol. Ie bol degen sóz - ony retteý, josparlaý, tıisti qurylystar salý, olardy kútý. Sý degen jaqsy qasıetimen elge qyzmet etýi kerek. Memlekettiń negizi - qaı memleket bolsyn, meniń túsinigimde, jer men sý. Jeri men sýy joq memleket bolmaıdy.
30 jylda memlekettiń negizi munaı dedi. Munaı - taýsylatyn resýrs. Sý, jer - taýsylmaıtyn resýrs. Qazaqstannyń ekonomıkasynyń, áleýmettik jaǵdaıynyń durys bolmaýy osy eki resýrsqa nazar aýdarmaýda dep esepteımin. 30 jyl Sý mınıstrligin qurmaı, byltyr qyrkúıekte qurdy. Sóıtip sý sharýashylyǵy mynadaı jaǵdaıǵa ákeldi. Ne qurylystary jumys istemeıdi, barlyq sý mamany qańǵyryp ketti. Oblysqa, aýdanǵa barsań, "sý jaǵdaıy ne bolyp jatyr?" dep suraıtyn adam joq. Qaıda ketti? Osyny qurtqan - biz. Sý mınıstrligin joıdyq, oblystyq, aýdandyq sý sharýashylyǵyn joıdyq. Onyń ornyna Astananyń mańaıynda kerek emes kontorlardy quryp alyp otyrmyz. Qazirgi kezde osy tasqynmen kim aınalysyp jatyr? Mynaý sýdyń ıesi kim dep suraý kerek qoı. Jańadan kelgen mınıstr júgirip júr, áli bir jyl bolǵan joq kelgenine. Osyǵan deıin kim jaýap berdi? Nazarbaev bárin, mınıstrlikti japty, qurtty", - dedi ol Ara Media-ǵa suhbatynda.
Injener, gıdrotehnık osy salada mamandar qańǵyryp ketkenin aıtty.
"Mınıstrlikti kúsheıtý kerek. Sý sharýashylyq mekemelerin oblystyq deńgeıde, aýdandyq deńgeıde kúsheıtýimiz kerek.
...Sý mamandary qańǵyryp ketti. Ony da birneshe jyl aıttym. Astanada otyryp egis egý, Astanadan otyryp egistikti sýarý degendi túsinbeımin. Bári aýylda, oblysta bolý kerek. Kanal sonda, sý sonda, jer sonda, sharýa qojalyqtary da sonda.
Sý mamany sonda bolý kerek. Astananyń mańaıynda sonyń bárin jınaqtaý degen aýrýǵa ushyrady. El aqyldasatyn mamandar tabylmaı jatyr", - deıdi ol Assyltas TV-ǵa bergen suhbatynda.
Aıta keteıik, keıingi málimetterge súıensek, sý tasqyny bastalǵaly beri azamattyq qorǵanys qyzmetteri 99 869 adamdy, onyń ishinde 36 591 balany qaýipsiz jerlerge jetkizdi. Ýaqytsha ornalastyrý pýnkterine 6 586 adam, onyń ishinde 3 197 bala ornalasty.
Aqtóbe, Qostanaı, Batys Qazaqstan, Aqmola, Qaraǵandy, Atyraý, Soltústik Qazaqstan jáne Ulytaý oblystarynda jergilikti aýqymdaǵy tótenshe jaǵdaılar jarıalandy.
Odan bólek 9 mıllıon tekshe metr erigen qar sýy shyǵarylǵan, 1,6 mıllıon qapshyq jáne 1,2 mıllıon tonna ınertti materıal tóseldi. Avarıalyq-qutqarý jumystaryna 34 272 adam, 4 myń tehnıka, 17 áýe kemesi jumyldyrylǵan.
