Búgin Bıshimbaevtyń sotynda aıyptalýshy burynǵy áıelin kóligin urlap, bopsalady dep aıyptady. Nazym Qaharman eks-jubaıynyń aıyptaýyna óz jaýabyn berdi.
Nazym Qaharman Núkenovanyń óliminen keıin balalary úshin alańdaǵanyn, sol úshin Bıshimbaevtyń anasynan kólik suraǵanyn jetkizdi. Aıtýynsha,eks-mınıstrdiń sheshesi túrli syltaý aıtyp, birde-bir kólikti bermegen.
“Kisi óltirilgennen keıin alǵashqy kúnderde balalarym úshin qatty ýaıymdadym. Olardy únemi baqylap otyrǵym keldi. Úsheýin de birdeı avtobýspen jetkize almaıtynymdy bilip, Qýandyqtyń ata-anasynan kólik suradym. Sebebi jelide túrli jaǵymsyz pikirler boldy. Árıne men ana bolǵan soń qatty alańdadym. Meni tek balalarymnyń jaǵdaıy alańdatty. Bıshimbaevtyń anasynyń sózinshe, barlyq kólikter tergeý ızolátoryna zat tasý jáne advokattardy aparý úshin kerek. Bul jerde bir ǵana qorǵanys bolýy kerek edi - shyn júrekten moıyndaý. Al qazir – sırk bolyp jatyr. Jalpy kólik berýden bas tartty. Ol nemerelerim aman qalady dep jaýap berdi”, – dedi Nazym.
Sondaı-aq ol 11 qarashada Bıshimbaevtyń ata-anasymen arada janjal bolǵanyn aıtty.
“Ekeýmiz ajyrasqanda Qýandyqtyń múlki bolmady. Biraq mekteptiń aqshasyn tólep, qamqorlyq jasap, barlyǵyn retteıtin áke boldy. Qýandyq adam óltirgen soń, balalardyń jaǵdaıy úshin, onyń ákesine qarjy máselesin kóterdim. Qýandyqtyń ákesi meni saýdager dep atap, eki ret urdy. Munyń bárin qyzym kórdi”, – dedi Nazym.
Nazymnyń aıtýnysha, qıyn jaǵdaı kezinde kómek qolyn sozǵan jalǵyz adam Baqytjan Baıjanov bolǵan.
“Balalarǵa qoldaý kórsetken, áke jaǵynan jalǵyz týysy – Baqytjan boldy. Ol bizge ózine tirkelgen kólikti alyp ketýdi usyndy. Sol kezde ol Qýandyqty “mal eken” dep aıtty. Kólikti balalar úshin aldym. Nátıjesinde men ury bolyp shyqtym. Aıtpaqshy, Qýandyqtyń ata-anasynyń Almatydaǵy páteriniń qulpyn qashan aýystyrǵanyn bilmeımin. Jańa jyl qarsańynda balalarym zattaryn alýǵa bardy da, ol jerde eshkim bolmaǵan soń zattaryn ala almady”, – dedi Nazym Qaharman.
