Jumbaq jaǵdaıda qaza tapqan Altynbek Sársenbaevtyń aǵasy Rysbek Sársenbaev «Ýaqyt kórsetedi» baǵdarlamasyna suhbat berip, eldegi ahýal jáne inisiniń qazasy týraly birqatar suraqtarǵa keńinen jaýap berdi. Suhbat barysynda ol «jyldaǵy dástúr» boıynsha Maqpal Júnisovanyń shaqyrýymen Zamanbek Nurqadilovtyń shańyraǵynda bolǵan kezde eks-prezıdent Nursultan Nazarbaevtyń inisi Bolat Nazarbaevpen dastarhandas bolǵany týraly aıtyp berdi.
– Biz kezdeskende janynda sońǵysy ma, álde sońǵysynyń aldyndaǵy ma, toqaldarynyń birimen otyrdy. Bir-birine anekdot aıtyp otyrdy. Anekdot aıtatyn jer emes qoı. Ketip te qalǵym keldi, bir dastarhanda otyrý jıirkenishti boldy. Maqpal da, qasymdaǵy jigitter de «dastarhannan úlken emessiń» dep jibermedi. Sosyn «Bolat qazaqta «óz aıaǵyńmen keldi me, Qudaı aıdap keldi me» degen sóz bar. Endi meni muqıat tyńda! Jaqsylap uǵyp al da, ana Nursultan aǵańa jetkizip bar. Túri buzyla bastady. Sodan men Zákeńniń memleketke, qazaqqa, Almatyǵa sińirgen eńbegi týraly aıttym. Jáne osyndaı azamatqa «óz-ózin úsh ret atyp óltirdi» dep jala japty. Osyny aıtqyzyp otyrǵan seniń aǵań ǵoı. Ótirigin doǵarsyn, Zákeń tiri bolsa óz namysyn ózi qorǵar edi. Ózi joq, onyń namysyn biz qorǵaımyz. Aǵańa aıt, qylmystyq is qozǵap, qylmysty ashsyn, bári úshin ózi jaýapty. Osyny jetkizip bar, – dedim.
Rysbek Sársenbaı Nazarbaevpen jolyǵa qalsa, osyndaı suraqtardy ózine tikeleı qoıatynyn da jetkizdi. Bul suraqtardy İshki ister eks-mınıstri Baýyrjan Muhametjanovqa da qoıǵanyn jasyrmady.
https://www.youtube.com/watch?v=2XT_uTC3zQk
