Burynnan shatqaıaqtap túrǵan ekonomıkalyq, áleýmettik máselelerge qıyndyq týdyryp turǵan Táýelsizdik kezeńdegi eń aýqymdy orys kóshine meıli Úkimet bolsyn, meıli Parlament bolsyn, biriniń aýzyna biri túkirip alǵandaı Eýrazıa ekonomıkalyq odaǵyn alǵa tartqannan basqa, el ılanatyndaı tushymdy jaýap aıta almaýda. Tipti, keı depýtat túndegi toıdyń áserinen aryla almaı júrgendeı "kelgenderge quraq ushpasaq qonaqjaılyǵymyz qaıda?" dep pikir bildiripti.
Prezıdentten keıingi ekinshi laýazym ıesi sanalatyn senat tóraǵasy Máýlen Áshimbaev ta saıası biliktiligin kórsetkisi kelgendeı, taǵy da sol Reseı basshylyǵyndaǵy odaqty alǵa tartty.
Jaqynda Elordanyń atyn aýystyrdyq. Ata Zańǵa da ózgerister engizilip, saıası jańarýǵa qadamdar jasalyp jatyr. Jańa Qazaqstan qurý - ishki reformany ǵana bildirmeıdi. Syrtqy saıasatta da jańa baǵyt aıqyndaýdan kórinedi. Reseı yqpalyndaǵy qaptaǵan odaqtar men uıymdarǵa Nazarbaev bıligi kezinde qol qoıylǵany belgili. Endeshe ol kelisimderge de búgingi ýaqyt tezimen, Jańa Qazaqstan kózimen qaraıtyn ýaqyt jetti. Eski kelisim-sharttar qazaqtyń kósegesin kógertpeıdi. Qazirgi qymbatshylyqtan da qutqarmaıdy. Bılik pen halyqtyń arasyn alshaqtatady. Jańarǵan Grýzın eliniń soǵystan qashqan orystarǵa ustanǵan pozısıasy bizge úlgi bolsa, káni!
Grýzıanyń kedenshileri "soǵysqa qarsymyn", "Pýtın agresor" deýge batyly jetken Reseılikterdi ǵana kirgizip jatyr eken. Eks-prezıdenti Sakashvılı de: "Orystyń kóbeıýi eldiń demografıasyna áser etedi", - dep málimdedi. Bizdiń shendilerdiń ózgeden nesi kem?! El oılaǵandy, bizdikiler de oılaı alady, Tiline de tusaý joq. Bar bolǵany saıası batyldyq jetpeıdi. Mundaı jaltaqtyqtyń shendilerge saıası upaı, azamattyq bedel ápermesi anyq
Senat tóraǵasyna qaraǵanda, Májilis depýtaty Dementeva Natalá erledi. Baqaı esepke júırik keı jerlesterimizdiń paıdakúnemdigine ókinish bildirip, qandastaryna "qazaq elinde turam deseń tilin bil, saltyn qurmette" dep úndeý sóz aıtty. Kelimsekterge "Shańyraqqa qara" dep qazaqy minez tanytty. 30 jyl qazaq tili dep zarlaǵandardyń jarapazanynan Natalányń syn sátte aıtqan osy bir aýyz sózi ózekti bolyp tur.
Esbol Úsenuly
Abai.kz
