Jurt izdemese de, onyń esimi birneshe márte daýly isterde qylań berip qalyp júr. Sonyń ishinde «Operator ROP»-taǵy (elimizdegi ýtılızasıa bıznesin monopolıaǵa aınaldyrǵan tuńǵysh prezıdenttiń qyzy Álıa Nazarbaevanyń kompanıasy) jáne aýylsharýashylyq tehnıkasyn ýtılızasıalaıtyn zaýyttaǵy urlyqty tergeý de bar. Deıturǵanmen, atyshýly isterde jaýapqa tartylǵan joq.
Qarasha aıynda sybaılas jemqorlyqqa qarsy qyzmet «Asqar Mamınniń aktıvteriniń zańdylyǵyn tekserýge eshqandaı negiz joq» dep málimdegen-di.
Rasynda da, Asqar Mamınniń ózinde tekseretindeı artyq dúnıesi joq. Esesine, onyń baýyrlary sheteldegi asa qymbat jyljymaıtyn múlikter men fırmalardyń ıesi bolyp shyqty. Aıtalyq, eks-premerdiń baýyry Marat MAMINNİŃ Astanada «Eýrazıa» atty iri saýda ortalyǵy ǵana bar. Al shetelde she?
2000-jyldardyń basynda Marat Mamın AQSH-tyń shyǵys jaǵalaýynda Florıdaǵa qonys aýdarmaq bolady. Biraq bul qadamy sátsizdikke ushyraǵan. 2008 jyly, ıaǵnı baýyry Qazaqstan temir jolyn basqaryp turǵan kezde, Marat Mamın Batysqa alǵash ret «joryq» jasaýǵa umtylady. Florıda qalasynda Alerma-Eurasia LLC ı EuroAsia-Alerma, Inc atty eki fırma ashypty. Bul eki kompanıa muhıttyń jaǵalaýyndaǵy ǵajaıyp saraıda ornalasqan. Eki qabatty osy ǵımaratta alty jatyn bólme, alty jýyný bólmesi, kamın, baseın jáne eki kólik turaǵy bar. Jalpy aýmaǵy – 770 sharshy metr. Mamın ony 8,2 mln AQSH dollaryna satyp alady.
Dese de, bul ǵımarat ıesine bereke ákelmedi. Bastapqy baǵasyn 11 mln AQSH dollary dep kórsetkenimen, nebári 6,5 mln dollarǵa satyp qutylǵan. 2009 jyly Marat Mamın men onyń jubaıy Gúlmıra Florıdadan terezesi teńizge qaraǵan eki páter satyp alǵan. Eki páterdiń shaǵyndaýyn olar 500 myń dollarǵa satqan. Aýdany – 278 sharshy metr, úsh jatyn bólmesi jáne úsh jýyný bólmesi bar, mıllıon dollarǵa alǵan ekinshi páterin rıeltorlar qazir 2 mln dollarǵa baǵalap otyr.
Osy ýaqyt ishinde Marat Mamın taǵy bir saraıǵa «tirkeledi». Ol úı anaý-mynaý emes, álemge máshhúr Disney World ornalasqan Orlanda qalasynyń shetki aýdandarynda, Olıvıa atty shaǵyn kóldiń jaǵasynda tur. Jer telimi – 20 sotyq, shaǵyn kemege arnalǵan aılaǵy jáne bar. Úıdiń aýdany – 550 sharshy metr eken. Alty jatyn bólmesi jáne vana bólmesi, qonaq bólme jáne úlken ashyq basseıini bar. Sońǵy ret bul úı 2004 jyly 1,3 mln dollarǵa satylypty. Qazirgi baǵasy 2,5 mln dollar shamasynda.
Aıta ketetin jaıt, Asqar Mamınniń týystary Shyǵys Eýropada da bıznes júrgizýge umtylypty. Biraq Chehıa men Slovakıada ashqan kompanıalarynyń tasy órge domalaı qoımaǵan.
«Óıtkeni, bul elderdiń joǵary laýazymdy sheneýnikteriniń arasynda birde-bir týystary bolmaǵan-aý», – dep keketedi telegram arna.
Dese de, Marattyń balasy Ernar Ulybrıtanıada birneshe fırmanyń qojaıyny ekeni belgili bolyp otyr. Biraq ol jerde kóp turaqtap, tabysqa jete qoımaǵan. Ernar Mamınniń Ulybrıtanıadaǵy turatyn úıi de osal emes. Terezesinen Londonnyń ataqty Gaıd Parki kórinetin ǵajaıyp taýnhaýs. Bir páteri 8,5 mln fýnt sterlıń, ekinshisi 6 mln fýnt sterlıń turady. Brıtanıalyq reestrde Mamınderdi bul jyljymaıtyn múlikti jalǵa alǵany kórsetilipti.
Al endi eks-premer Asqar Mamınniń shetelde dúnıe-múlki men esepshoty joq degenge senesiz be? İndetip zertteıtin-aq taqyryp eken.
