Tiri bolsam, qazaqqa qyzmet etpeı qoımaımyn!

Álıhan Bókeıhan

"Otyz jyldaı otyryp aldy". Qyrǵyz prezıdenti Nazarbaev týraly aıtty

19 jeltoqsan 2023 40
Qyrǵyzdyń Memlekettik týyn ózgertýdi qoldaǵan prezıdenti Sadyr Japparov jurt aldynda sóılegen sózinde Qazaqstannyń eks-prezıdenti Nursultan Nazarbaevty esine aldy.
«Qazaqstannyń Prezıdenti (burynǵy)  30 jyldaı otyryp aldy ǵoı basqaryp. Astanany Almatydan kóshirerde Parlamentke kelip surandy. Sol kezde depýtattar qarsy shyqty. «Aqmolaǵa kóshirgen degen ne?», «en dala emes pe?», «sýyq» desken. Shyn máninde, Astanada qutyrǵan ıtti baılasań turmaıdy. Bilesińder ǵoı. Sýyq qoı. Sol kezde Nazarbaev minberde turyp: «Qurmetti el-jurtym, meniń de oılaǵanym bar. Búgin týǵan kúnim eken, bir ret maquldańdarshy», – dep surady. Qazaq Parlamenti 90-95 paıyz bolyp maquldap, qoldap berdi», – deıdi Japparov sóılegen sózinde.

Onyń sózinshe, qazirgi kúngi Astana dúnıejúzindegi eń aldyńǵy shaharlardyń birine aınalǵan.
«Men endi Borbordy (Bishkekti solaı ataıdy) kóshir dep turǵam joq, basqa jaqqa shahar salam dep suranǵam joq, eń bolmasa, jelekti (týdy) ózgertýge meni bir qoldap berýge bolatyn shyǵar? Suranǵandaryńyzdy qoldap turam. Suraǵan meni de qoldap berińder. Tý esh ózgermeıdi. Tek sál túzetiledi», – deıdi ol.

Aıta keteıik, Qyrǵyzstannyń Joǵarǵy keńesiniń depýtattary Memlekettik týdaǵy kún sáýlesiniń pishinin ózgertýdi usynyp otyr. Ózgeristerdiń bastamashylary – spıker Nurlanbek Shakıev pen depýtat Ulan Prımov. Olar búgingi kúnge deıin Qyrǵyzstan týyn «kúnbaǵys gúli dep qabyldaıtyndar bar, jalaýsha beınesiniń maǵynasyn ekiushty túsindirýdi joıý úshin sharalar qabyldaý qajet» dep esepteıdi. Sol sebepti tolqyndy shashaqty depýtattar tik shashaq qylyp ózgertip, rasynda da, kún beınesin kórsetken jón deıdi.
Bul maqala týraly ne oılaısyz?