Tiri bolsam, qazaqqa qyzmet etpeı qoımaımyn!

Álıhan Bókeıhan

Kólginov sportshylardyń qandaı tólemaqysyn sheshpekshi?

29 naýryz 2022 83

Nur-Sultan qalasynyń ákimi Altaı Kólginov Instagram paraqshasynda elordalyq sportshylarǵa qandaı qoldaý sharalary kórsetiletinin aıtty, dep habarlaıdy qala ákimdiginiń resmı saıty.


«Osyǵan deıin federasıamyzdyń sportshylarymen, jattyqtyrýshylarymen jáne basshylarymen kezdesý ótkizdik. Olar mańyzdy problemalardy qozǵady: sport jabdyqtarymen jabdyqtaý, jattyqtyrýshylardyń jalaqysyn kóbeıtý, sportshylardy yntalandyrý (olımpıadalyq emes sport túrleri), sportshylarǵa arnalǵan jeke medısınalyq mekeme jáne t.b.


Birinshiden. Sport mekemeleriniń jaı-kúıi men qoljetimdiligi


Sportshylar men búldirshinderdi daıyndaýda jattyǵý orny men qural-jabdyqtary mańyzdy ról atqarady. Máselen, osyǵan deıingi kezdesýlerde sport mekemelerindegi oryndar tıimdi paıdalanylýy kerektigi, bos oryndar bolmaýy qajet ekeni talqylanǵan. Nátıjesinde, «Astana Arena» stadıonynyń bazasynda jekpe-jek sport túrlerine arnalǵan zal ashtyq.


Sonymen qatar, sportshylar men qala turǵyndarynyń ótinishi boıynsha úrlemeli fýtbol alańy (Almaty aýdany) jóndeldi, «Tolqyn» sport kesheni kúrdeli jóndeýden ótti. Sol sıaqty «Qazaqstan» sport kesheninde aýqymdy modernızasıalaý, «Jastar» saraıyn qaıta jańartý jumysy júrip jatyr. Al apatty jaǵdaıda turǵan Q.Muńaıtpasov atyndaǵy Ortalyq stadıonnyń ornyna jańa yńǵaıly sport kesheni salynady.


Qalamyzda túrli sport nysandary bar. Ol oryndarda jattyǵýlarǵa arnalǵan qosymsha saǵattar bólinedi, osylaısha sport nysandary qala turǵyndary men óskeleń urpaǵymyz úshin qoljetimdi bolmaq. Osy baǵyttaǵy jumystarymyzdy ary qaraı jalǵastyramyz, sebebi túrli usynystar túsip jatady. Usynystar arasynda sporttyq qural-jabdyqtar satyp alý máselesi de bar.


Ekinshiden. Sportshylarǵa arnalǵan medısınalyq mekeme


Sportshylarymyzǵa ýaqytyly ári jyldam túrde medısınalyq kómek kórsetýdiń mańyzy zor. Bul problemany osyǵan deıingi kezdesýde sportshylarymyz ben jattyqtyrýshylarymyz kótergen. Sportshylarymyzǵa arnalǵan medısınalyq mekeme bıyldan qalmaı ashylady. Qazir ǵımarattyń azdaǵan jumysy qaldy. Endi medısınalyq qyzmetkerlerdi oqytý, arnaıy jabdyqtar satyp alý qajet.


Úshinshiden. Bilim granttary, tólemder


Bala kúninen sportpen aınalysyp kele jatqan jastarymyz osy baǵyttaǵy jolyn ary qaraı da jalǵastyrýy úshin JOO-lardyń bilim granttaryn bólemiz. Byltyr ózge sanattardan bólek bir ǵana sport salasy boıynsha 50 grant bólindi. Bul baǵdarlamany bıyl da jalǵastyramyz. Sol sıaqty 2020 jyly kásibı sportshylar men jattyqtyrýshylardyń (jekelegen sanattar) 10 jyldan beri ózgerissiz kele jatqan aı saıynǵy aqysyn ulǵaıttyq.


Kezdesý barysynda qozǵalǵan tólem máselesine keler bolsaq, ózge problemalar sıaqty sheshý úshin qolǵa aldyq. Olardyń bir bóligin qysqa ýaqytta sheshýge bolady, sol sıaqty júıeli túrde sheshilýi tıis máseleler de bar. Al tólem máselesin jaýapty mınıstrlikpen birlesip sheshemiz.


Memleket basshysynyń tapsyrmasyna sáıkes buqaralyq sportpen aınalysý úshin jaǵdaı jasaýǵa, balalar men jasóspirimder sport mektepterin qoldaýǵa erekshe nazar aýdaramyz. Osy baǵyttarǵa aldaǵy jazbalarymda jeke-jeke toqtalamyn», – dep jazdy elorda ákimi.

Bul maqala týraly ne oılaısyz?