İshki ister mınıstrligi vedomstvo basshysy Erlan Turǵymbaevtyń otstavkaǵa ketkeni týraly áleýmettik jelide tarap jatqan aqparatty teristedi.
"İshki ister mınıstri Erlan Turǵymbaevtyń otstavkaǵa ketkeni týraly aqparat shyndyqqa sáıkes kelmeıdi" dedi vedomstvonyń baspasóz qyzmeti. Olar mekeme basshysynyń kestege saı jumys istep jatqanyn da aıtty.
22 aqpanda ishki ister mınıstri Erlan Turǵymbaevtyń otstavkaǵa ketetini týraly habardy alǵash bolyp belsendi Toǵjan Qojalıeva taratqan.
Turǵymbaevtyń otstavkasy týraly habar qańtar oqıǵasy boıynsha ustalǵandardyń azaptalǵany týraly shaǵymdar kóbeıip, UQK-nyń burynǵy tóraǵasy Kárim Másimov pen onyń birneshe orynbasary, buǵan qosa burynǵy qorǵanys mınıstri Murat Bektanov qamalǵan tusta tarady. Qańtar oqıǵasynan keıin tergeý ızolátorlaryndaǵy azaptaýlar jaıly kóp shaǵym tústi. İİM polısıanyń ustalǵandardy azaptaǵany týraly aqparatty joqqa shyǵarǵan.
Ótken aptada Turǵymbaevtyń otstavkasyn talap etken petısıaǵa myńdaǵan adam qol qoıǵan. Petısıa avtorlary qamaýdaǵy azaptaýlar týraly shaǵymdardyń kóptigin alǵa tartyp, qańtar oqıǵasyn jan-jaqty zertteýge shaqyrǵan. Olar Almatydaǵy alańda 6 qańtarda beıbit narazylarǵa oq atqandardy da jaýapqa tartýdy talap etken.
Qańtar oqıǵasy kezinde qazaqstandyq polıseıler qyzmet ornyn tastap ketkeni úshin de aıyptaldy. Bas prokýratýra málimdemesinde "Almaty jáne Jambyl oblystarynda [polısıa] qyzmetkerleri qarsylyq kórsetpesten memleket múddesi men qoǵam qaýipsizdigine qaıshy áreket etip, qarý-jaraq pen oq-dári bar polısıa departamenti ǵımaratyn tastap ketti" dep jazylǵan. Sonyń nátıjesinde vedomstvo málimetinshe, 1,5 myńnan astam qarý-jaraq joǵalǵan.
