«Qurmetti baspasóz qyzmetkerleri!
Barshańyzdy Ulttyq basylym kúnimen shyn júrekten quttyqtaımyn!
Sonaý 1913 jyly, dál osy kúni elimizdiń baspasóz salasynyń bastaýynda turǵan «Qazaq» gazetiniń alǵashqy sany jaryq kórdi. Halqymyzdyń birtýar perzentteri – Alash arystary shyǵarǵan bul basylym syndarly sátterde ultty uıystyrýǵa aıryqsha yqpal etti.
Sóz bostandyǵyna adaldyǵynan aınymaǵan basylymdar árdaıym shynaıy aqparattyń jáne sapaly saraptamanyń qaınar kózi bolyp qala beredi.
Gazet-jýrnaldar zamana tynysyn dóp basyp, memleket pen qoǵamdaǵy qordalanǵan máselelerdi kóteredi, túrli kózqarastaǵy oı-pikirlerdi jaryqqa shyǵarady. Sondaı-aq jalpy adamzatqa ortaq izgi qundylyqtardy dáripteıdi.Baspasóz qyzmetkerleri kásibı biliktiliktiń, otanshyldyq pen jaýapkershiliktiń ozyq úlgisin kórsetip keledi.
Bizdiń basylymdarymyz halyqtyń birligin nyǵaıtýǵa atsalysyp, Ádiletti Qazaqstandy qurý isine eleýli úles qosa beredi dep senemin. Sizderge zor densaýlyq, baq-bereke jáne shyǵarmashylyq shabyt tileımin!», – delingen Prezıdenttiń quttyqtaýynda.
Foto: Aqorda
