Batys Qazaqstan oblysynyń ákimdigi 15 sáýirde Oral qalasynyń turǵyndaryna eskertý jasady.
Barshańyzǵa belgili, qalada sý tasqyny qaýpine oraı kúrdeli jaǵdaı qalyptasyp otyr. Mamandardyń aıtýynsha, Reseı Federasıasynan sýdyń mol kólemi 2-3 kúnde qalamyzǵa jetedi. Qaýipti deńgeı 8,5 metr bolsa, qazir Jaıyqtyń deńgeıi 8 metrge jýyqtady. Sý tasqynyna qarsy jumysqa jergilikti atqarýshy organnyń jáne tótenshe jaǵdaı qyzmetiniń barlyq resýrsy tartyldy. Qazir 350 arnaıy tehnıka, 2000-ǵa jýyq adam tasqynǵa tosqaýyl qoıýǵa jumyldyrylǵan. Sondaı-aq ózge óńirlerden, oblysymyzdyń aýdandarynan kelgen áskerı qyzmetshiler, tótenshelikter jáne eriktiler bul jumysqa belsene atsalysyp jatyr, - delingen habarlamada.
Ákimdik Jaıyq jaıylymyndaǵy saıajaılardyń, sý basý qaýpi joǵary Kýrenı, Starısa, Komıntern aýdandarynyń turǵyndary evakýasıa jasaý qajet ekenin eskertti.
Eń bastysy - azamattardyń amandyǵy. Sondyqtan Jaıyq jaıylymyndaǵy saıajaılardyń, sý basý qaýpi joǵary Kýrenı, Starısa, Komıntern aýdandarynyń turǵyndary evakýasıa jasaý qajet. Sýdyń mol kólemi kez-kelgen ýaqytta jetip, úıińizdi sý basýy múmkin. Ózińizdiń jáne jaqyn adamdaryńyzdyń ómirin qaýipke tikpeı, shuǵyl túrde týma-týys, dostaryńyzdyń úıine ornalasyńyz. Ýaqytsha baratyn úı bolmasa, qalada evakýasıalyq pýnktter jasaqtalǵan. Olar turǵyndardy kúni-túni úzdiksiz qabyldaıdy. Suraqtar boıynsha qalalyq shtabqa 24-05-70 jáne 24-01-94 telefon nómirleri arqyly habarlasýǵa bolady. Evakýasıany qazirden bastańyz!, - delingen ákimdik habarlamasynda.
