Germanıa Reseıdiń Berlındegi dıplomatıalyq ókildiginde jumys isteıtin 40 qyzmetkerdi persona non grata dep jarıalady. Olardyń bári Germanıadan ketýge tıis.
Bul sheshimdi Germanıa Syrtqy ister mınıstri Analena Berbok "Reseı dıplomattary árbir kúni adam bostandyǵyna, qoǵamǵa qarsy jumys istedi" dep túsindirdi.
Analena Berbok "Kıev túbindegi Býcha qalasynda shashylyp jatqan máıit sýretteri Reseı basshylyǵynyń ýkraındarǵa asqan qatygezdik jasap, jaýyzdyq kórsetip jatqanyn bildiredi" dedi.
Germanıa Syrtqy ister mınıstri Máskeýge sanksıany qataıta túsýge, NATO-nyń shyǵys qaptalyn nyǵaıtýǵa ýáde berdi.
Reseı Syrtqy ister mınıstrliginiń resmı ókili Marıa Zaharova 40 dıplomattyń Germanıadan shyǵarylǵany jaýapsyz qalmaıtynyn aıtty.
Germanıada Reseıdiń 104 dıplomaty akredıtasıalanǵan.
Fransıa da Reseı dıpmıssıasynyń qyzmetkerlerin shyǵaryp jiberýge kiristi. Fransýz BAQ-tarynyń málimetine qaraǵanda, Fransıadan Reseıdiń 30 dıplomaty ketedi. Parıj Reseı dıplomattarynyń áreketteri Fransıa qaýipsizdigine qaıshy keledi dep sanaıdy.
Reseı syrtqy ister mınıstrligi Parıjge de jaýap shara qoldanbaqshy.
Dúısenibi, 4 sáýirde Lıtva da Reseımen dıplomatıalyq qatynasyn shekteı bastady. Vılnús Máskeýdegi elshisin shaqyryp alyp, Lıtvadaǵy Reseı elshisin qaıtarýǵa sheshim qabyldady.
Reseı Syrtqy ister mınıstrligi "eki jaqty qarym-qatynastarǵa nuqsan keltiretin jaýdyń áreketin jasap otyr" dep Lıtvany aıyptady.
Lıtvanyń izimen Latvıa da sondaı sheshim qabyldady.
2 sáýirde Kıev túbindegi Býcha qalasynda júzdegen beıbit adamnyń máıitin shashylyp jatqany týraly habar taraı bastaǵan. Bul qalany bir aıdan astam Reseı áskeri basyp alyp, baqylaýynda ustaǵan edi. Reseı áskeri ketken soń qalaǵan Ýkraına áskeri kirgen.
