Máskeýdiń Ostankıno soty Birinshi arna redaktory Marına Ovsánnıkovaǵa "zańsyz narazylyq aksıasyna shaqyrǵany úshin" 30 myń rúbl kóleminde aıyppul saldy.
Ovsánnıkova 14 naýryzda keshke "Vremá" jańalyqtar baǵdarlamasynyń tikeleı efıri bolyp jatqanda stýdıada otyrǵan dıktordyń qasyna atyp shyǵyp, "Soǵysty toqtatyńyzdar. Propagandaǵa senbeńizder. Bul jerde sizderdi aldap jatyr" degen plakat ustap turdy. Ol dıktor sóılep jatqanda "Soǵysty toqtatyńyzdar! Soǵysqa jol joq!" dep qarsylyq bildirdi. "Pervyı kanal" osy jaıtqa baılanysty tekseris bastaǵan, artynsha Ovsánnıkovanyń ustalyp, ústinen ákimshilik is qozǵalǵan degen habar shyqty.
Sot otyrysynan "Medıazona" translásıa júrgizdi. Sýdıa Anna Bolotnıkovanyń aıtýynsha, polısıa "ınternet monıtorıń kezinde" jýrnalısiń jurtty "narazylyq aksıasyna shaqyrǵan" vıdeosyn tapqan. Jýrnalıs taǵylǵan aıyppen kelispedi.
Aqparatqa qaraǵanda, jýrnalıs Birinshi arna efırine shyqpaı turyp vıdeomálimdeme jasaǵan. Vıdeonyń sońynda tilshi "mıtıńige shyǵyńyzdar" deıdi. Vıdeorolıkte ol úgit-nasıhatqa aralasqanyn alǵa tartyp, sol isine ókinetinin aıtady.
"2014 jyly bastalǵan kezde bárimiz únsiz qaldyq. Kreml Navalnyıǵa ý bergen kezde mıtıńige shyqqan joqpyz. Biz antıgýmandy rejımdi únsiz baqyladyq. Qazir bizden búkil álem teris aınaldy. Bizden keıin on býyn aýyssa da, myna masqaradan aryla almaıdy. Biz, orys halqy, oıly, aqyldymyz. Bul bassyzdyqty toqtatý tek bizdiń qolymyzdan ǵana keledi. Mıtıńige shyǵyńyzdar, eshteńeden qoryqpańyzdar, olar bizdiń bárimizdi otyrǵyza almaıdy" dedi tilshi.
Jýrnalıs 14 naýryzda aksıadan keıin "Ostankıno" teleortalyǵynda ustalǵan. Onyń qaıda ekeni uzaq ýaqyt belgisiz boldy. Memlekettik TASS agenttiginiń derekkózi naýryz basynda kúshine engen armıanyń bedeline nuqsan keltirý týraly qylmystyq bap boıynsha tergeýge deıingi tekseris júrgizip jatqanyn habarlaǵan. Ol boıynsha jýrnalıske 10 jyl túrme jazasy berilýi múmkin.
