Tiri bolsam, qazaqqa qyzmet etpeı qoımaımyn!

Álıhan Bókeıhan

"Biz tarıhı kelisimge qol qoıamyz". Qazaqstan - Qyrǵyzstan qarym qatynasy qalaı damıdy?

19 sáýir 2024 355

Qazaq-qyrǵyz qarym-qatynasy strategıalyq seriktestik rýhynda damyp kele jatyr. Bul týraly Aqordada Qyrǵyzstan Prezıdenti Sadyr Japarovpen kelissóz barysynda Memleket basshysy Qasym-Jomart Toqaev aıtty.

«Eń aldymen, shaqyrýymdy qabyl alyp, Qazaqstanǵa resmı saparmen kelgenińiz úshin Sadyr Nýrgojoevıchke shynaıy alǵysymdy aıtamyn. Men bul saparǵa erekshe mán berip otyrmyn. Qyrǵyzstan — biz úshin baýyrlas el, mańyzdy ári senimdi seriktes. Halyqtarymyzdyń myzǵymas dostyǵy ortaq tarıhqa jáne rýhanı qundylyqtarǵa negizdelgen. Osyndaı bastaýy bar qazaq-qyrǵyz qarym-qatynasy strategıalyq seriktestik rýhynda damyp kele jatyr», — dedi Qasym-Jomart Toqaev.

Bul turǵyda Memleket basshysy eki el odaqtastyq baılanysty nyǵaıtýdy qolǵa alǵanyn atap ótti.

«Búgin biz tarıhı kelisimge qol qoıamyz. Osy mańyzdy qujat qazaq-qyrǵyz qatynastarynyń damýyna tyń serpin beretinine eshqandaı kúmán joq. Sondyqtan úlken úmitpen qarap otyrmyz. Oǵan bizdiń múmkindigimiz de, ynta-jigerimiz de jetkilikti. Joǵarǵy memleketaralyq keńestiń otyrysy yntymaqtastyq aıasyn keńeıtýge jol ashady dep sanaımyz», — dedi Qazaqstan Prezıdenti.

Búgin Memleket basshysy Qasym-Jomart Toqaev Qazaqstanǵa resmı saparmen kelgen Qyrǵyzstan Prezıdenti Sadyr Japarovty Aqordada kútip aldy. 

Keshe, 18 sáýir kúni Memleket basshysy Qasym-Jomart Toqaev Qazaqstanǵa resmı saparmen kelgen Qyrǵyzstan Prezıdenti Sadyr Japarovty elorda áýejaıynda qarsy alǵan bolatyn.

Astanada Qasym-Jomart Toqaev pen Sadyr Japarov eki el ónerpazdarynyń gala-konsertin tamashalady.

Sondaı-aq, elordada Qyrǵyz Respýblıkasynyń Prezıdenti Sadyr Japarovtyń resmı sapary aıasynda Qazaqstannyń mádenıet jáne óner qaıratkerlerine Qyrǵyzstannyń memlekettik nagradalaryn tapsyrý rásimi ótti.

Bul maqala týraly ne oılaısyz?