Qýandyq Bıshimbaev isin qarap jatqan memlekettik aıyptaýshy prokýror Aıjan Aımaǵanova jelidegi oqyrmandaryna alǵys aıtyp, bolyp jatqan oqıǵalarǵa nemquraıly qaramaýǵa shaqyrdy, dep habarlaıdy alash.kz.
Prokýror Aıjan Aımaǵanova sot otyrysy bastalǵan sátten bastap halyqtyń ystyq yqylasyna bólengen. Áleýmettik jelidegi paraqshasyna 240 myńǵa jýyq oqyrman jazylǵan. Ol alǵash ret jazba jarıalap, oıyn bólisti.
Qaıyrly kún! Meniń akkaýntymdy kópshilikke jarıa ete otyryp, kóptegen adamdar maǵan jazylady dep oılaı almadym. Tek jalǵan akkaýnttardan aýlaq bolǵym keldi. Bul meniń áleýmettik jelilerdegi jalǵyz paraǵym, mende tık-tok joq. Meniń stýdenttik kezimnen @zhakiti akkaýntym bar, osyǵan oraı osyndaı ataý aldy. Qazir prokýratýra qyzmetkeri retinde maǵan júktelgen barlyq jaýapkershilikti túsinip, bar akkaýntty @aimaganova_a dep ózgertýge jáne qoǵamǵa ashyq ári paıdaly bolýǵa sheshim qabyldadym, - dep jazdy ol.
Qazirgi jaǵdaıda ózge áriptesteri sekildi jelide belsendi bola almaıtynyn atap ótti.
Men sizderdiń qoldaýlaryńyz, keńesterińiz, qamqorlyǵyńyz úshin árqaısyńyzǵa alǵys aıtqym keledi! Ómirde qoldanatyn kóp nárse uqtym. Bir aıtyp ketetin jaǵdaı: adam bolyp ómirge kelgen soń adam bolý - mindet. Sondyqtan bolyp jatqan isterge beı-jáı qaraý – bir súıkimsiz adamı qasıet. Eń bastysy- júrekpen sezinip, jaqsy nıetińdi aıamaý. Jan-jaqtaǵy bolyp jatqan oqıǵalarǵa nemquraıly qaramaıyq, qol úshin berip kómekteseıik.
