Tiri bolsam, qazaqqa qyzmet etpeı qoımaımyn!

Álıhan Bókeıhan

Belsendi prezıdent Toqaevqa útik "syılady". Endi ony qýdalap jatyr

12 tamyz 2022 82
 



13 qańtarda Aqmola oblysy Shýchınsk qalasy ákimdigi aldynda Qazaqstan prezıdenti Qasym-Jomart Toqaevqa syılyq retinde útik ákelgen 41 jastaǵy Vladımır Prokopevtiń ústinen ákimshilik is qozǵaldy. Bul týraly belsendi Azattyqqa habarlady.

Prokopev útikke "Toqaev jáne KO" dep jazǵan. Aksıa kezinde túsirip, óziniń Instagram paraqshasyna jarıalaǵan vıdeoda ol "[Útik] Qazaqstan halqynyń atynan. Mahabbatpen" dep, ákimdik aldyna qoıady.

— Maǵan qańtar oqıǵasy áser etti. Ustalǵan, azaptalǵan kóp adamdy kórdim. Ustalǵannyń kóbi — jazyqsyz adamdar. Olardy májbúrlep moıyndatyp jatyr. Útikpen kúıdirip te azaptaǵan. Útik azaptaý sımvolyna aınaldy. Sondyqtan prezıdentke útik syılaıyn dep sheshtim. Útikke "Toqaev jáne KO" dep jazdym, ıaǵnı bul Toqaev pen onyń tobyna, úkimet pen parlamentke syılyǵym, — dedi Prokopev Azattyqqa bergen suhbatynda.

Oǵan eshkim kedergi keltirmegen. Biraq aksıasyn aıaqtalǵan soń ákimdik mańynda ony eki adam toqtatqan.

— Eki qyzmetkerdiń biri ózin "polıseımin", ekinshisi "Ulttyq qaýipsizdik komıtetinde isteımin" dep tanystyrdy. Jolymdy jaýyp, ketýime tosqaýyl boldy. Tikeleı efırge shyǵyp edim, maǵan tap berdi de, telefonymdy tartyp almaq boldy. Efırdi sóndirip, telefondy tyǵyp qoıdym. Meni qyzmettik "ýazık" kóligine otyrǵyzdy. İshte de maǵan telefonymdy ustaýǵa ruqsat etpedi. Maǵan ustalǵan adamdaı qarap, quqyǵymdy buzdy, — deıdi ol.

Olar belsendini Býrabaı aýdandyq polısıa bólimshesine aparady. Prokopevtiń sózinshe, polısıada bes jarym saǵat tergegen. Ústinen zańsyz mıtıńige ekinshi ret shyǵý babymen (ákimshilik quqyq buzýshylyq kodeksi 488-babynyń 11-tarmaǵy) hattama toltyrady. Belsendiniń sózinshe, alǵashqy eskertý oǵan qańtar basyndaǵy narazylyqqa shyǵyp, ustalǵan kezde berilgen.

Belsendiniń isi boıynsha, 14 aqpanda sot ótýi kerek edi. Biraq bir kúnge shegerildi. Ol kináli dep tanylsa, 150 myń teńge aıyppul tóleıdi ne 20 kúnge qamalýy múmkin.

Sot otyrysy áli ótpegenine qaramastan, 14 aqpanda Aqmola oblystyq polısıa departamenti Instagram-daǵy resmı paraqshasy arqyly belsendiniń jazbasyna "Bul azamat (Prokopevti aıtady — red.) ákimshilik quqyq buzýshylyq boıynsha jaýapqa tartyldy" dep pikir qaldyrǵan.

Tergeý kezinde belsendi ákimshilik arazdyq qozdyrý babymen qozǵalǵan qylmystyq iste qorǵalý quqyǵy bar kýáger ekenin de bilgen. Prokopevtiń sózinshe, tergeýshi oǵan qylmystyq is boıynsha túsinik alynýy kerek azamattar tiziminde baryn kórsetken. Aqmola oblystyq polısıasy bul týraly komentarı bermedi.

Qazaqstanda qańtar oqıǵasy kezinde jáne odan keıin myńdaǵan adam ustalyp, júzdegen adam "terorızm", "jappaı tártipsizdik", "qarý-jaraqty urlaý" jáne ózge qylmys jasady degen kúdikpen qamaýǵa alyndy. Ustalǵandardyń kóbiniń týystary qamaý kezindegi azaptaýlarǵa shaǵymdandy: olardyń sózine qaraǵanda, polısıa bólimshelerinde jaqyndarynyń ústinen ystyq sý quıyp, útikpen jáne elektroshokermen kúıdirgen, qatty uryp-soqqan. Qylmysty moıyndatýǵa tyrysqan. Buǵan deıin bas prokýratýra ustalǵandardan azaptaý jáne zańsyz tergeý ádisin qoldaný boıynsha 300-den astam shaǵym túskenin, 170-i boıynsha qylmystyq is qozǵalǵanyn habarlaǵan. Degenmen mekeme áli kúnge deıin qansha polıseıdiń ustalǵanyn aıtpaı otyr.

29 qańtarda memlekettik arnaǵa suhbat bergen Toqaev "[azaptaý týraly] málimdemelerde asyra aıtý basym" degen. Munan soń "polısıa shekten shyǵyp jatqan jaǵdaılar bolsa, onyń áreketin aqtamaımyn. Buǵan jol bermeımiz" dedi.

Bıyl qańtarda Jańaózen men Aqtaý qalalarynda suıytylǵan gaz baǵasynyń qymbattaýyna baılanysty jappaı narazylyq bastalyp, onyń sońy el aýmaǵynda tártipsizdik pen zorlyq-zombylyqqa ulasqan. Basqa aımaqtarda bolǵan qaqtyǵys, atys kesirinen keminde 227 adam qaza boldy.





[ad_2]

Derekkóz
Bul maqala týraly ne oılaısyz?