Qazaqstanda qańtar oqıǵasynan keıin kúshtik qurylymdardyń áreketine baılanysty prokýratýraǵa 363 shaǵym túsken, azaptaý jáne tergeýdiń zańsyz ádisteri boıynsha 178 qylmystyq is tergelip jatyr. 16 aqpanda keshke Bas prokýratýranyń qylmystyq qýdalaý qyzmeti tóraǵasynyń orynbasary Eldos Qılymjanov osylaı dep málimdedi.
Qoǵamda rezonans týdyrǵan 8 is arnaıy prokýrorlar óndirisine alynǵan. Arasynda Atyraýda "Dınamo" sport kesheninde bolǵan jaǵdaı men Almaty oblysynda Azamat Batyrbaev pen kámeletke tolmaǵan Esbolatulynyń azaptalýy boıynsha ister bar.
Sársenbi kúni Bas prokýratýra brıfıńisinde qańtar oqıǵasyna baılanysty qozǵalǵan ister men ózge de derekter aıtyldy. Eń negizgileri tómendegideı:
- Elde qańtar oqıǵasyna baılanysty sotqa deıingi 3096 is tirkelgen. Arnaıy prokýrorlar jappaı tártipsizdik jáne terorızm aktisi boıynsha 181 isti tergep jatyr.
- 741 kúdikti sot sanksıasymen qamaýǵa alynǵan. Vedomstvo málimetinshe, 113-i – buryn sottalǵan, 42-i – ekstremıstik uıym ókili (qaı uıymdar ekenin naqtylamady, biraq bılik buǵan deıin quqyq qorǵaýshylar daýly sheshim dep ataǵan uıym ókilderi baryn aıtqan), 35-i – uıymdasqan qylmystyq top múshesi.
- 157 kúdiktiniń bultartpas sharasy densaýlyǵy jáne ózge jaıttarǵa baılanysty qamaýmen baılanysty emes shara túrimen almastyrylǵan.
- Tártipsizdikke qatysy joq 103 adam ýaqytsha qamaý ızolátorynan bosatylǵan.
- Densaýlyq saqtaý mınıstrliginiń málimetinshe, qańtar oqıǵasy kezinde 1726 adam medısınalyq kómekke júgingen: 673-inde oq jaraqaty bolǵan, 469 adam pyshaq nemese úshkir zattarmen jaraqattanǵan, 431 adamnyń ózge dene jaraqat túrleri bolǵan. Almatyda – 686 adam, Almaty oblysynda – 336, Qyzylorda oblysynda – 164, Jambyl oblysynda – 153, Shymkentte – 126, Shyǵys Qazaqstan oblysynda 126 adam medısınalyq kómekke júgingen. Resmı aqparat boıynsha, olardyń keıbiri "memlekettik nysandarǵa shabýyl kezinde" jaralanǵan.
- "Tártipsizdik" kezinde 3 myńnan astam áskerı qyzmetker jáne quqyq qorǵaý organ ókili túrli dene jaraqat alǵan.
- Qazir aýrýhanalarda 273 adam emdelip jatyr, bir bóligi reanımasıada.
Jergilikti aqparat quraldarynyń habarlaýynsha, 18 qańtarda densaýlyq saqtaý mınıstri Ajar Ǵınıat elde tótenshe jaǵdaı jarıalanǵaly beri 2739 adamnyń medısınalyq kómekke júgingenin málimdegen. Ol kezde 200 adamnyń stasıonarda emdelip jatqany, 14-i reanımasıa ekeni habarlanǵan. Sol kúni ishki ister mınıstri kúshtik qurylymnyń 2911 ókiliniń túrli dárejede jaraqat alǵanyn aıtqan.
Ótken aıdyń basynda halyqtyń ómir súrýiniń nasharlaýynan týyndaǵan jappaı narazylyqtyń sońy qantógiske ulasqan kezde Qazaqstan bıligi "memlekettik tóńkeris" jasaý talpynysy týraly aıtty. Bılik "syrtqy kúshter" men elge "gastarbaıter" retinde kelgen "sodyrlar" týraly aıtqanmen oǵan dálel keltirmegen.
