Qazirgi qoǵamda mamandyq jynys tańdamaıtyn boldy. As úı áıelderdiki bolǵanymen, dámhana-meıramhanalarda bas aspaz bolyp, qazan-oshaq jaǵalap júrgen erler kóp. Sol sıaqty tik ushaq basqaryp, mal jaıyp júrgen qyz-kelinshekterdi de kóp kezdestiremiz. Bul naryq talaby. Óıtkeni mynaý erkektiń, anaý áıeldiń jumysy dep qol qýsyryp otyrýǵa bolmaıdy.
Er-azamattarmen ıyq tirese jumys istep júrgen arýlar kez-kelgen salada bar. Solardyń biri Aınur Prjekenova. Ol, Almaty oblystyq «Jol aktıvteriniń ulttyq sapa ortalyǵynda» sarapshy bolyp jumys isteıdi. Qarapaıym tilmen aıtqanda oblys aýmaǵynda tóselip jatqan tas joldardyń sapasyna jaýapty maman. 10 jyl boıy zerthanashy bolyp jumys istegen. Iaǵnı, oblystyq nemese respýblıkalyq mańyzy bar joldardan synama alyp, sapasyn baqylaıdy.
-Jol zerthanalarynyń negizgi maqsaty, qurylys materıaldarynyń sapasyn baqylaý. Iaǵnı asfálttyń, bıtýmnyń quramyn zerttep, tehnologıalyq talaptardyń oryndalýyn qamtamasyz etemiz. Ol úshin tas joldardan synama alyp tekseremiz. Jol tóseıtin qurylys materıaldaryn shelekke salyp alyp, zerthanaǵa ákelemiz. Qum-tas óte aýyr. Biraq mamandyǵym negizgi jumysym osy bolǵandyqtan eshkimge shaǵym aıtpaı-aq shelekke salynǵan asfáltty arqalap júre beremin. Ony zerthanaǵa ákelip jiti tekseremiz. Óıtkeni tehnologıalyq talap buzylsa, joldyń sapasy bolmaıdy. Bir maýsymǵa jetpeı shuryq-tesik bolyp oıylyp, mújilip ketýi múmkin. Sondyqtan jumysyma óte jaýapty qaraımyn-deıdi Aınur Prjekenova.
Ol Almaty oblysyndaǵy joldardyń sapasyn bes saýsaǵyndaı biledi. Qaı aýdanǵa qandaı asfált tóselgenin de jańylmaı aıtyp berýge daıyn. Óıtkeni jol salatyn kompanıalardyń qurylys materıaldaryn ózi súzgiden ótkizip shyǵady. Mamandyǵyna degen adaldyqtyń arqasynda Aınur Prjekenova búginde sarapshy laýazymyna deıin kóterildi. Jol salasynda júrgenine 14 jyl boldy. Bilimi men biliktiliginiń arqasynda ujymda óte syıly qyzmetker.
«Jol aktıvteriniń USO» Almaty oblystyq fılıalynyń baspasóz qyzmeti
